పశ్చిమగోదావరి జిల్లాలో రాజకీయ రోగం.!

ఓ వైపు జనం వింత వ్యాధితో సతమతమవుతోంటే, ఇంకోపక్క వింత రాజకీయాలు చేస్తున్నాయి ప్రధాన రాజకీయ పార్టీలు. కొద్ది నెలల క్రితం ఏలూరులో ఓ ప్రాంతానికి చెందిన కొందరు ప్రజలు, వున్నట్టుండి కళ్ళు తిరిగి పడిపోవడం, ఫిట్స్‌తో కింద పడిపోవడం.. ఈ క్రమంలో పెద్దయెత్తున రాష్ట్ర వ్యాప్తంగా ఆందోళన నెలకొనడం తెలిసిన విషయమే. దేశవ్యాప్తంగా తీవ్ర అజలడి సృష్టించింది ఈ ఘటన. ఇప్పటిదాకా ఈ ఘటనకు కారణమేంటి.? అన్నది మాత్రం తేలలేదు. అయితే, క్రమంగా బాధితుల సంఖ్య తగ్గడంతో అంతా ఊపిరి పీల్చుకున్నారు. కొన్ని ప్రాణాలు పోయినప్పటికీ.. ఎంత వేగంగా రోగం ఉధృతమయ్యిందో, అంతే వేగంగా అలజడి చల్లారిపోయింది.

ఇక, తాజాగా పశ్చిమగోదావరి జిల్లాలోనే దెందులూరులో ఈ తరహా వింత రోగం వెలుగు చూసింది. బాధితులు కళ్ళు తిరిగి పడిపోతుండడంతో వారిని ఆసుపత్రులకు తలరించి వైద్య చికిత్స అందిస్తున్నారు. వైద్య చికిత్స అందుకున్న వెంటనే బాధితులు కోలుకుంటుండడంతో అధికారులు ఊపిరి పీల్చుకుంటున్నారు. అయితే, వైద్య ఆరోగ్య శాఖ మంత్రి ఆళ్ళ నాని మాత్రం, ఈ వ్యవహారంపై పలు అనుమానాలు వ్యక్తం చేయడం రాజకీయంగా పెను అలజడికి కారణమయ్యింది.

‘దేవాలయాలపై దాడులకు సంబంధించి రాజకీయ ప్రమేయం వున్నట్లు రుజువయ్యింది.. ఈ వింత రోగాల వెనుక కూడ రాజకీయ పాత్ర వుండి వుండొచ్చు..’ మంత్రి ఆళ్ళ నాని వ్యాఖ్యానించడం గమనార్హం. బాధ్యతాయుతమైన మంత్రి పదవిలో వున్న వ్యక్తి ఇలా మాట్లాడటం ఎంతవరకు సబబు.? అధికార పార్టీలో వున్నాం.. ఏదైనా మాట్లాడతాం.. అన్నట్టుంది అధికార వైసీపీ వైఖరి. లేకపోతే, డీజీపీ.. రాష్ట్రంలో దేవాలయాలపై దాడులకు సంబంధించి రాజకీయ పార్టీలకు చెందిన వ్యక్తుల పాత్ర వుందని ప్రకటిస్తే మాత్రం.. అది న్యాయస్థానాల్లో నిరూపితమవ్వాలి కదా.!

అయినా, దేవాలయాలపై దాడుల ఘటనకీ.. వింత రోగాలకీ ఎలా లింకులు పెట్టగలుగుతారు.? అంతర్వేది రథాన్ని ఎవరు తగలబెట్టారు.? అన్నదానిపై ఇప్పటిదాకా రాష్ట్ర పోలీసులు ఎటూ తేల్చలేకపోయారు. అలాంటిది, దేవాలయాలపై దాడులకు సంబంధించి రాజకీయ పార్టీలకు లింకులు పెట్టడమేంటి.? ఎలాగోలా, విపక్షాల్ని వివాదాల్లోకి లాగెయ్యాలి, రాజకీయ లబ్ది పొందాలన్న ఆలోచన తప్ప, కనీసపాటి విజ్ఞత పాటించడంలేదు అధికార పార్టీ నేతలు.