ఓటిటి రివ్యూ: సూపర్ ఓవర్ – టైటిల్ అంత ఎగ్జైటింగా లేకపోయినా ఓకే ఓకే.

భానుమతి రామకృష్ణ తో ఓటిటిలో హిట్ కొట్టిన నవీన్ చంద్ర, కలర్ ఫోటోతో హిట్ కొట్టిన చాందిని చౌదరి కలిసి నటించిన సినిమా ‘సూపర్ ఓవర్’. క్రికెట్ బెట్టింగ్ నేపథ్యంలో సాగే ఈ సినిమాకి దర్శకత్వం వహించిన ప్రవీణ్ వర్మ ఈ సినిమా మధ్యలో మరణించారు. కానీ ఈ చిత్ర టీం సినిమాని ఫినిష్ చేసి రిలీజ్ చేశారు. నేడు ఆహాలో రిలీజైన ఈ సినిమా ఎలా ఉందో ఇప్పుడు చూద్దాం..

కథ:

కాశీ(నవీన్ చంద్ర), వాసు(రాకేందు మౌళి), మధు(చాందిని చౌదరి)లు మంచి ఫ్రెండ్స్.. కాశీ ఏమో యుఎస్ వెళ్లాలని బ్రోకర్ కి డబ్బు కట్టి లాక్ అయిపోతాడు, వాసు ఏదో జాబ్ చేస్తుంటాడు. కాశీకి ఇంట్లో సమస్య వలన వాసు, మధు సపోర్ట్ తో ఎంపిఎల్ క్రికెట్ బెట్టింగుల్లో డబ్బులు సంపాదిద్దామని ఫిక్స్ అవుతారు. అనుకున్నట్టుగానే కోటి 70 లక్షలు సంపాదిస్తారు. ఓ రోజు రాత్రి ఆ డబ్బులు హవాలాలో తీసుకోవడానికి బయల్దేరతారు. అలా డబ్బుకోసం వెళ్లిన కాశీ, వాసు, మధులకి ఎలాంటి పరిస్థితులు ఎదురయ్యాయి. ఆ రాత్రి తెల్లార్లు వాళ్ళు ఎలాంటి ఇబ్బందులు పడ్డారు. ఈజీగా సంపాదించిన డబ్బు ఎన్ని ఆగచాట్లకు గురిచేసింది? ఎంతమంది చేతులు మారింది? చివరికి ఆ డబ్బు ఎవరికి చేరింది అనేదే కథ.

తెరమీద స్టార్స్..

నటీనటుల విషయానికి వస్తే అందరూ తమ పాత్రలకి పూర్తి న్యాయం చేశారు. ఏదైనా చేసి డబ్బు సంపాదించాలి అనే పాత్రలో నవీన్ చంద్ర అదరగొట్టాడు. అటు ఆనందం, టెన్షన్, కోపం ఇలా అన్ని ఎమోషన్స్ ని పర్ఫెక్ట్ గా పలికించాడు. కెరీర్ మొదట్లో అటు ఇటు ఉన్న పాత్రల్లో కనిపించిన నవీన్ ఇప్పుడు కనిపించే ప్రతి సినిమాలో మెప్పిస్తూ దూసుకుపోతున్నాడు. ఇద్దరి డిఫరెంట్ మెంటాలిటీస్ ఉన్న ఫ్రెండ్స్ మధ్య పాజిటివ్ మైండ్ తో ఉండే పాత్రలో చాందిని చౌదరి బాగా చేసింది. ప్రతి దానిలో నెగిటివ్ ని మాత్రమే చూస్తూ, అక్కడక్కడా నవ్వుని తెప్పించే డైలామా స్నేహితుడి పాత్రలో వెన్నెలకంటి రాకేందు మౌళి బాగా నటించాడు. ముఖ్య పాత్రల్లో నటించిన ప్రవీణ్, అజయ్ బాగా చేశారు.

తెర వెనుక టాలెంట్..

ఈ సినిమాకి రచన – దర్శకత్వం వహించిన ప్రవీణ్ వర్మ సినిమా రిలీజయ్యే టైంకి మన మధ్య లేరు కావున అతని గురించి నెగటివ్ కాకుండా సింపుల్ గా ఎలా ఉంది ఏంటి అనేది చెప్పుకుంటే.. కథలో పాయింట్ అందరికీ కనెక్ట్ అయ్యేది, కానీ కథనంలో టూ మచ్ సినిమాటిక్ లిబర్టీస్ తీసుకోవడం వలన చాలా చోట్ల అంత ఈజీ గా జరిగిపోతాయా అనిపిస్తుంది. అలాగే నేరేషన్ ఇంకాస్త గ్రిప్పింగ్ గా ఉండాల్సింది. డైరెక్టర్ గా ఓకే అనిపించుకున్నాడు. దర్శకుడు సుధీర్ వర్మ నిర్మాణం బాగుంది.

ఇక టెక్నీకల్ డిపార్ట్మెంట్స్ లో చెప్పుకోవాల్సింది, దివాకర్ మణి విజువల్స్.. దాదాపు సినిమా మొత్తం నైట్ ఎఫెక్ట్ లో ఉంటుంది, కానీ ప్రతి విజువల్స్ ని థ్రిల్లర్ కి తగ్గట్టు పర్ఫెక్ట్ గా షూట్ చేసాడు. ఆ విజువల్స్ కి తగ్గట్టే సన్నీ ఎంఆర్ మ్యూజిక్ సూపర్బ్ ఉంది. పలు చోట్ల టెన్షన్ ని క్రియేట్ చేయగలిగాడు. అలాగే ‘ఆహా’లో రాబోతున్న ఈ సినిమాను అందరూ ఎంజాయ్ చెయ్యండి. నేనైతే విపరీతంగా ఎంజాయ్ చేసాను.

విజిల్ మోమెంట్స్:

– నవీన్ చంద్ర, చాందిని చౌదరి పెర్ఫార్మన్స్
– సూపర్బ్ విజువల్స్
– బ్యాక్ గ్రౌండ్ మ్యూజిక్
– ఎక్కువ మందికి కనెక్ట్ అయ్యే క్రికెట్ నేపధ్యం

బోరింగ్ మోమెంట్స్:

– ఆసక్తి కలిగించని కథనం
– థ్రిల్స్ పెద్దగా కిక్ ఇవ్వకపోవడం
– టూ మచ్ సినిమాటిక్ లిబర్టీస్
– సరిగాలేని పలు పాత్రల ముగింపు
– సింపుల్ అండ్ తెలిసిన పాయింట్

విశ్లేషణ:

క్రికెట్ బెట్టింగ్ నేపథ్యంలో సాగే ఈ ‘సూపర్ ఓవర్’ టైటిల్ కి తగ్గట్టుగా సూపర్ ఓవర్ అంత ఎగ్జైట్ గా లేదు, అలా అని మరీ అంత బాడ్ గానూ లేదు. సీట్ ఎడ్జ్ లో కూర్చొని చూసే థ్రిల్లర్ లా మొదలు పెట్టి, మధ్యలో కథనంలో థ్రిల్లింగ్ మజా మిస్ అవ్వడం, క్లైమాక్స్ మరీ ఊహాజనితంగా సాగడం సినిమాకి మైనస్. కానీ సినిమా నిడివి కేవలం 83 నిముషాలు మాత్రమే అవ్వడం వలన పరవాలేదనిపిస్తుంది.

చూడాలా? వద్దా?: బాగా బోర్ కొడుతుంటే ఒకసారి ట్రై చేయచ్చు.

తెలుగుబులెటిన్.కామ్ రేటింగ్ : 2/5