చనిపోయాడని అంత్యక్రియలు నిర్వహించారు..! మూడు నెలలకు తిరిగొచ్చాడు

చనిపోయాడని భావించి ఇంటి సభ్యుడికి అంత్యక్రియలు నిర్వహించింది ఆ కుటుంబం. కానీ.. మూడు నెలల తర్వాత తిరిగి ప్రత్యక్షమవడం వారిని విస్మయపరచింది. విచిత్రంగా.. పోలీసులు కూడా ఈ విషయంలో పొరబడటం. ఈ సంఘటన కేరళలోని పత్తినంతిట్ట జిల్లలోని కుదస్సనాడులో జరిగింది. వివరాల్లోకి వెళ్తే.. తిరువనంతపురంలో సాబూ అనే వ్యక్తి క్యాటరింగ్, బస్ క్లీనింగ్ వంటి పనులు చేసేవాడు. పలుమార్లు దొంగతనం కూడా చేసేవాడు. ఈక్రమంలో తాను పని చేసే హోటల్ లో దొంగతనం కేసులో సాబూను పోలీసులు అరెస్టు చేశారు.

ఆ తర్వాత డిసెంబర్ 24న కొట్టాయం జిల్లా పాలాలో ఓ వ్యక్తి మృతి చెందాడు. పోలీసులు ఆ మృతదేహాం సాబూదే అని భావించి కుటుంబానికి సమాచారం ఇచ్చారు. వారూ అలానే భావించి మృతదేహానికి అంత్యక్రియలు నిర్వహించారు. అయితే.. రీసెంట్ గా ఓ బస్ డ్రైవర్ కు సాబూ కనిపించాడు. వెంటనే ఈ విషయాన్ని పోలీసులకు, కుటుంబానికి సమాచారం ఇచ్చారు. దీంతో పోలీసుల్లో అలజడి మొదలైంది. చనిపోయిన మృతదేహం ఎవరిదో కనుక్కునే ప్రయత్నాల్లో మునిగిపోయారు.