తమిళ నటుడు విజయ్ ఆంటోనీ హీరోగా నటించిన ‘రోమియో’ని తెలుగులో ‘లవ్ గురు’ పేరుతో డబ్ చేశారు. ‘లవ్ గురు’ అని పేరు పెట్టి, ఫ్యామిలీ సినిమా.. అంటూ ఎలా ప్రమోట్ చేశారు.? సినిమా కథ కమామిషు ఏంటో తెలుసుకుందాం పదండిక.
కథ:
ముప్ఫయ్ అయిదేళ్ళ మోస్ట్ ఎలిజిబుల్ బ్యాచిలర్ అరవింద్ (విజయ్ ఆంటోనీ), ప్రేమించి పెళ్ళి చేసుకోవాలనుకుంటాడు. ఓ అమ్మాయితో తొలి చూపులోనే ప్రేమలో పడతాడు, వెంటనే పెళ్ళయిపోతుంది. ఇక్కడే పెద్ద ట్విస్ట్, పెళ్ళిని అడ్డం పెట్టుకుని, ఇంట్లోంచి పారిపోవాలనుకుంటుంది అతన్ని పెళ్ళి చేసుకున్న లీల (మిర్నాలిని రవి). లీల ఎందుకలా చేసింది.? అరవింద్, లీల వైవాహిక బంధం ఏమయ్యింది.? అన్నది తెరపై చూడాల్సిందే.
నటీనటులు..
అరవింద్ పాత్ర కోసం ఏమేం చేయాలో అన్నీ చేయడానికి సిన్సియర్గా ప్రయత్నించాడు విజయ్ ఆంటోనీ. డల్ లుక్.. పోష్ లుక్.. రెండిట్లోనూ, ఆ వ్యత్యాసాన్ని చూపించేందుకు ఎనర్జీ పరంగా తగిన జాగ్రత్తలు తీసుకున్నాడు.
మిర్నాలిని రవి తన పాత్రకు న్యాయం చేసింది. ట్రెడిషనల్గానూ, ట్రెండీగానూ.. నేచురల్ లుక్తో కనిపించింది. యోగిబాబు ఇచ్చే ప్రేమ సలహాలు థియేటర్లలో నవ్వులు పూయించాయి. హీరో మావయ్య పాత్రలో వీటీవీ గణేష్ తన ట్రేడ్ మార్క్ కామెడీ పండించాడు. హీరో తల్లి పాత్రలో సుధ కనిపించింది.
సాంకేతిక నిపుణులు..
కథ కొత్తదేమీ కాదు. కథనం పరంగానూ మరీ ఎక్కువ ట్విస్టులేమీ పెట్టెయ్యకుండా కథని నేరుగానే చెప్పేశారు. ‘జనని’ ఎవరు అన్న ప్రశ్న చివరి వరకూ ప్రేక్షకుడ్ని కొంత అయోమయంలోకి నెట్టేస్తుంది. అది రివీల్ అవడం ఒకింత ఇంట్రెస్టింగ్గా అనిపిస్తుంది. డైలాగ్స్ బాగానే వున్నాయి. తెలుగు నేటివిటీకి తగ్గట్టుగానే సన్నివేశాలు, డైలాగులు అనిపిస్తాయ్. మ్యూజిక్ ఓకే. ఎడిటింగ్ బావుంది. కొంచెం ట్రిమ్మింగ్కి ఆస్కారం వుంది. టైటిల్ పరంగా యూత్ని టార్గెట్ చేసినట్లు అనిపిస్తుందిగానీ, ఫ్యామిలీతో కలిసి చూసే సినిమానే. నిర్మాణపు విలువలు ఓకే.
ప్లస్ పాయింట్స్
- సరదా సరదాగా సాగే కొన్ని సన్నివేశాలు
- ప్రీ క్లయిమాక్స్లో చెల్లెలి సెంటిమెంట్
మైనస్ పాయింట్స్
- అక్కడక్కడా సాగతీతగా అనిపించే సన్నివేశాలు
విశ్లేషణ: విజయ్ ఆంటోనీ అనగానే, ఆ సినిమా ఇలా వుండొచ్చు.. అన్న ఐడియాతోనే ప్రేక్షకుడు థియేటర్లోకి అడుగు పెడతాడు. అలా చూస్తే, ఈ సినిమాలో అద్భుతాలేం కనిపించవు. అలాగని, సినిమా నిరాశపరచదు కూడా. కాసిని నవ్వులున్నాయ్.. ఎమోషనల్ సీన్స్ వున్నాయ్.. కాస్త రొమాంటిక్ టచ్ కూడా వుంటుంది. సిస్టర్ సెంటిమెంట్, భార్యా భర్తల మధ్య సన్నివేశాలకి ఆడియన్స్ కనెక్ట్ అయితే, సినిమాకి మంచి రిజల్ట్ వచ్చే అవకాశం వుంది.
తెలుగు బులెటిన్ రేటింగ్: 2.5/5