విశాఖ ల్యాండ్ స్కామ్: వైసీపీ నేత మోసపోవడమేంటి చెప్మా.?

అధికార పార్టీకి చెందిన నాయకుడాయన.. పైగా, సీనియర్ నేత. అందునా ఓ ప్రజా ప్రతినిథి. 100 కోట్ల రూపాయల విలువైన భూమి, తక్కువ ధరకే వచ్చేస్తుందని ఎవరో చెబితే నమ్మేశారట. చివరికి మోసపోయారట. విదేశాల్లో వున్న ఓ వ్యక్తికి చెందిన భూమి అది. దాని మార్కెట్ విలువ 100 కోట్లు. చాలా తక్కువ ధరకు దాన్ని ఓ వ్యక్తి అమ్మేందుకు ప్రయత్నించారు. వ్యవహారం దాదాపుగా సజావుగానే సాగిపోయింది. ఇంతలో విషయం సదరు ఎన్నారైకి తెలిసేసరికి, కథ మొత్తం మారిపోయింది. ఈ మొత్తం వ్యవహారంలో నిందితులైతే పోలీసులకు చిక్కారు. అక్రమార్కులకు సహకరించిన ఓ అధికారిని కూడా సస్పెండ్ చేసినట్లుగా ప్రచారం జరుగుతోంది.

అసలు కథ ఇప్పుడే మొదలైంది. సదరు వైసీపీ నేత పట్ల ‘సింపతీ’ వచ్చేలా మీడియాలో కథనాలు షురూ అయ్యాయి. అయినా, రాజకీయ నాయకులు మోసపోవడమేంటి.? అందునా, అధికార పార్టీకి చెందిన ఓ ప్రజా ప్రతినిథి మోసపోవడమేంటి.? ఈ ప్రశ్న ఇప్పుడు విశాఖ వాసుల మెదళ్ళను తొలిచేస్తోంది. సదరు ప్రజా ప్రతినిథిపై గతంలో ఏమన్నా కేసులున్నాయా.? బ్యాడ్ ట్రాక్ రికార్డ్ వుందా.? అన్నది వేరే చర్చ.

విశాఖ సహా ఉత్తరాంధ్ర వ్యవహారాల్ని చక్కబెడుతున్న ఓ వైసీపీ ముఖ్య నేత దృష్టికి వెళ్ళకుండా ఆ ప్రాంతంలో ఇంత పెద్ద ‘డీల్’ జరిగిందని ఎలా అనుకోగలం.? అన్న ప్రశ్న తెరపైకొస్తోంది. ‘అదీ నిజమే సుమీ..’ అని విశాఖ వాసులు చర్చించుకుంటున్నారు. తక్కువ ధరకి సదరు భూమిని కొట్టేద్దామని అధికార పార్టీ నాయకులు ప్లాన్ చేస్తే, దానికి సదరు ఎన్నారై చెక్ పెట్టారంటూ కొత్త వాదన తెరపైకొచ్చింది.

కేసు తమ మీదకు రాకుండా ‘సింపతీ’ డ్రామాకి వైసీపీ నేత తెరలేపారట. ఇది నిజమేనా.? రాజకీయ ప్రత్యర్థుల ఆరోపణ మాత్రమేనా.? ‘మా హయాంలో అక్రమార్కుల ఆటలు సాగనివ్వం..’ అని వైసీపీ ముఖ్య నేతలు, మంత్రులు.. వీలు చిక్కినప్పుడల్లా చెబుతున్నారు కదా.? మరి వైసీపీ ప్రజా ప్రతినిథి మోసపోయే పరిస్థితి ఎందుకొచ్చింది.? ఇది వైసీపీ పాలన తాలూకు అసమర్థత అనుకోవచ్చా.?