నారా లోకేష్ సుగాలి ప్రీతి కుటుంబాన్ని పరామర్శించొచ్చుగా.?

టీడీపీ జాతీయ ప్రధాన కార్యదర్శి, మాజీ మంత్రి నారా లోకేష్, అధికార వైసీపీ మీద నిప్పులు చెరిగేస్తున్నారు. మొన్నీమధ్యనే గుంటూరు జిల్లాలో ఓ యువతి దారుణ హత్యకు గురైతే ఆ ఘటనపై లోకేష్ తీవ్రంగా స్పందిస్తూ, ప్రభుత్వాన్ని నిలదీశారు. అంతకు ముందు ముఖ్యమంత్రి నివాసానికి కూతవేటు దూరంలో ఓ యువతిపై అత్యాచారం జరిగిన ఘటనపైనా లోకేష్ తీవ్రంగా స్పందించారు.

నిన్ననే గుంటూరు జిల్లా నర్సరావుపేటకు వెళ్ళి ఓ కుటుంబాన్ని పరామర్శించాలనుకున్నారు.. ఆ కుటుంబం కూడా ఓ బిడ్డను కోల్పోయింది.. మృగాళ్ళ కారణంగా. ఘటన జరిగిన ఏడు నెలల తర్వాత లోకేష్ అక్కడికి వెళ్ళి ఏం చేస్తారు.? అంటూ హోం మంత్రి మేకతోటి సుచరిత ప్రశ్నించేశారు. లోకేష్ ఏం చేస్తారు, మహా అయితే పరామర్శించి వస్తారు.. ప్రభుత్వం మీద నాలుగు విమర్శలు చేస్తారు. ఆయన వెంట కొందరు కార్యకర్తలు వుంటే వుంటారు.

గతంలో వైఎస్ జగన్ మోహన్ రెడ్డి ప్రతిపక్ష నేత హోదాలో ఇలాంటివి ఎన్ని చేయలేదు గనుక.? ‘సుగాలి ప్రీతి కుటుంబాన్ని నారా లోకేష్ ఎందుకు పరామర్శించడంలేదు..’ అని ప్రశ్నించేశారు హోంమంత్రి మేకతోటి సుచరిత. ఓ హోంమంత్రి సంధించాల్సిన ప్రశ్నేనా ఇది.? సుగాలి ప్రీతి కుటుంబం న్యాయం కోసం పోరాడుతోంది. వైఎస్ జగన్ ప్రభుత్వం చేతులెత్తేసింది.. అంతకు ముందు చంద్రబాబు ప్రభుత్వం కూడా చేతులెత్తేసింది. ఈ అంశంపై జనసేన పోరుబాట పడితే, జగన్ సర్కార్ దిగొచ్చి, సీబీఐ విచారణకు ఆదేశించింది. అంతే, ఆ కేసు వ్యవహారంపై మళ్ళీ జగన్ సర్కార్ పట్టించుకున్న దాఖలాల్లేవు.

దిశ యాప్ పేరుతో పబ్లిసిటీ చేయాలన్న యావ తప్ప ప్రభుత్వానికి, మహిళలపై జరుగుతున్న నేరాల్ని నియంత్రించాలన్న సోయ కనిపించడంలేదన్న విమర్శలున్నాయి. దిశ యాప్ పేరుతో హంగామా మొదలయ్యాక కూడా చాలామంది మహిళలు వేధింపుల్ని ఎదుర్కొంటున్నారు.. హత్యలకు గురవుతున్నారు.. అత్యాచారాలకు గురవుతున్నారు. ఇది ముమ్మాటికీ వైసీపీ ప్రభుత్వ వైఫల్యమే.