ఉద్యమం.. విధ్వంసం.. నీతులు గులాబీ పార్టీనే చెప్పాలి.?

తెలంగాణ రాష్ట్ర సాధన కోసం జరిగిన ఉద్యమాల్లో చాలా వింతలు, విడ్డూరాలూ చోటు చేసుకున్నాయి. ప్రస్తుత ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌రెడ్డి మీదకి అప్పట్లో ‘గులాబీ రాళ్ళు’ దూసుకెళ్ళాయి. అవే ఇప్పుడు గులాబీ పూలుగా మారి.. ఆయనకు స్వాగతం పలుకుతున్నాయి. ఏ పారిశ్రామికవేత్తలు.. కాంట్రాక్టర్లకు అయితే అప్పట్లో గులాబీ ముళ్ళు గుచ్చుకున్నాయో.. ఆ కాంట్రాక్టర్లు ఇప్పుడు గులాబీ పూలు పరిచిన కార్పెట్‌ మీద నడుచుకుంటూ తెలంగాణ సర్కార్‌ స్వాగతాన్ని అందుకుంటున్నారు.

కానీ, తెలంగాణ కోసం ఉద్యోగాలు వదిలేసి.. రోడ్డెక్కిన ఆర్టీసీ కార్మికుల పరిస్థితి ఏంటి.? మళ్ళీ రోడ్డెక్కారు.. అదీ ఉద్యోగాలు పోగొట్టుకుని. ‘సెల్ఫ్‌ డిస్మిస్‌..’ అంటూ ముఖ్యమంత్రి కేసీఆర్‌, ఆర్టీసీ కార్మికుల్ని చాలా లైట్‌ తీసుకున్నారు. అప్పట్లో ఇదే ఆర్టీసీ కార్మికులు, అప్పటి ప్రభుత్వం చెప్పినట్లు నడుచుకుని వుంటే.. కేసీఆర్‌, తెలంగాణ రాష్ట్రానికి ముఖ్యమంత్రి అయ్యేవారా.? ఉద్యమాల పేరుతో విధ్వంసాలు చేస్తే ఊరుకునేది లేదంటూ గులాబీ పార్టీ నీతులు చెబుతోంది. విద్వంసాల గురించి గులాబీ పార్టీ మాట్లాడితే అంతకన్నా హాస్యాస్పదం వుండదు.

అసెంబ్లీ సాక్షిగా ఓ ఎమ్మెల్యేని తెలంగాణ వ్యతిరేకి.. అని పేరు చెప్పి చితక్కొట్టిన ఘనత గులాబీ పార్టీది. ఆర్టీసీ బస్సులు బద్దలయ్యాయి.. ఇంకా చాలా చాలా జరిగాయి. ఎంతమంది విద్యార్థులు ఆత్మబలిదానాలకు పాల్పడ్డారు.? ఆ త్యాగాల కారణంగానే కేసీఆర్‌, ఆయన కుటుంబం.. ఇప్పుడు అధికారం వెలగబెడ్తోంది. తెలంగాణ వ్యతిరేకులకే కేసీఆర్‌ క్యాబినెట్‌లో ఉన్నత పదవులు దక్కాయి. ఆ ఆవేదనను సాక్షాత్తూ ఉద్యమ మంత్రులే చెబుతున్నారు.

కేసీఆర్‌ ప్రభుత్వ తీరుని నిరసిస్తూ ఓ ఆర్టీసీ కార్మికుడు ఆత్మ బలిదానానికి యత్నించాడు. ప్రస్తుతం అతని ఆరోగ్య పరిస్థితి విషమంగా వుంది. ‘సెల్ఫ్‌ డిస్మిస్‌’.. అని కేసీఆర్‌ నిర్లక్ష్యపూరితంగా చేసిన ప్రకటన తాలూకు ఫలితమిది. ఉమ్మడి ఆంధ్రప్రదేశ్‌ రెండుగా విడిపోబట్టే.. ఈ రోజు ఆంధ్రప్రదేశ్‌లో ఆర్టీసీ బాగుపడింది.. ప్రభుత్వంలో విలీనమవుతోంది. తెలంగాణ రాష్ట్రం వచ్చింది.. తెలంగాణ ఆర్టీసీ నష్టాల్లో కూరుకుపోయింది. విభజనతో తెలంగాణకు లాభం జరిగిందా.? నష్టం జరిగిందా.? కేసీఆర్‌ కుటుంబానికి లాభం.. తెలంగాణకు నష్టమంటోంది తెలంగాణ ఆర్టీసీ. ఇదే నిజం.! అని తాజా పరిణామాలు నిరూపిస్తున్నాయి.