కేసీఆర్‌ బయోపిక్‌: వర్మ ఆ సెగని తట్టుకోగలడా?

రామ్‌గోపాల్‌ వర్మ ‘టైగర్‌ కేసీఆర్‌’ టైటిల్‌ని ఎందుకు ముందే ప్రకటించాడు? చేతిలో చేయడానికి చాలా సినిమాలుండగా, టైటిల్‌ని ప్రకటించి, తద్వారా ఎందుకు విమర్శలు ఎదుర్కొంటున్నట్లు? ‘ఆడు’ అనే మాటని కేసీఆర్‌ మీద రామ్‌గోపాల్‌ వర్మ ఎందుకు విసిరాడు? వంటి ఎన్నో ప్రశ్నలు ఇటు సినీ జనాల్నీ, అటు రాజకీయాల్లో వున్న జనాల్నీ ఆశ్చర్యపరుస్తున్నాయి. అయితే రామ్‌గోపాల్‌ వర్మ పబ్లిసిటీ స్టంట్లు చేయడంలో దిట్ట. ఓ సినిమా ప్రమోషన్‌ కోసం ఇంకో సినిమా ప్రకటనని వాడుకుంటాడాయన.

‘లక్ష్మీస్‌ ఎన్టీఆర్‌’ సినిమాని ఆంధ్రప్రదేశ్‌లో విడుదల చేసుకోలేకపోయిన రామ్‌గోపాల్‌ వర్మ, బహుశా ‘టైగర్‌ కేసీఆర్‌’ సినిమాని కూడా తెలంగాణకే పరిమితం చేసినా ఆశ్చర్యపోనక్కర్లేదు. ఎందుకంటే, టైటిల్‌ లుక్‌తోనే వర్మ ఆంధ్రోళ్ళపై ‘కసి’ ప్రదర్శించేశాడు. తాను ఆంధ్రుడై వుండి కూడా ఆంధ్రోళ్ళకి వ్యతిరేకంగా కేసీఆర్‌ మీద సినిమా తీయాలనుకోవడమే ఆశ్చర్యకరం. కేసీఆర్‌ కూడా ఆంధ్రోళ్ళను మంచోళ్ళుగా చెప్పినాక, ఆంధ్రోళ్ళ గురించి వర్మ నెగెటివ్‌గా మాట్లాడటమంటే ఆయన ఏదో సంచలనం ఆశిస్తున్నాడే విషయం అర్థమవుతోంది.

ఇదిలా వుంటే వర్మ, తాను నటిస్తున్న ‘కోబ్రా’ సినిమా కోసం ‘టైగర్‌ కేసీఆర్‌’ని వాడుకుంటున్నట్లు కన్పిస్తోంది. ‘కోబ్రా’ సినిమాలో వర్మ ఇన్వెస్టిగేషన్‌ ఆఫీసర్‌గా కనిపిస్తాడు. ఇది కరడుగట్టిన మాఫియా లీడర్‌ నయీమ్‌ బయోపిక్‌ అని అనుకోవచ్చు. నయీమ్‌ కొంత కాలం క్రితం తెలంగాణలో జరిగిన ఎన్‌కౌంటర్‌లో ప్రాణాలు కోల్పోయిన సంగతి తెల్సిందే. ఆ నయీమ్‌ పాత్ర చుట్టూ కొన్ని సినిమాలూ వచ్చాయి. అయితే, వర్మ కొత్తగా ‘కోబ్రా’ పేరుతో ఏం చేయగలడు? అనే డౌట్‌ చాలామందిలో వుంది.

ఇక్కడ ఇంకో విషయం ప్రస్తావించుకోవాలి. నయీమ్‌పై సినిమా తీయాలని గతంలోనే వర్మ అనుకున్నాడు. అప్పట్లో ఓ టైటిల్‌ కూడా ప్రచారంలోకి వచ్చింది. దాన్ని ఇప్పుడు ‘కోబ్రా’ పేరుతో వర్మ మళ్ళీ ప్రాచుర్యంలోకి తెచ్చాడు. వర్మ ప్రకటించి ఆపేసిన సినిమాల లిస్ట్‌, ఆయన తీసిన సినిమాల లిస్ట్‌ కంటే చాలా పెద్దదిగా కన్పిస్తుంది. అదే రామ్‌గోపాల్‌ వర్మ ప్రత్యేకత. ‘కోబ్రా’ సినిమాలో కొన్ని నిజాల్ని వర్మ చూపించబోతున్నాడనీ, అది తెలంగాణలో అధికార పార్టీకి షాక్‌ ఇవ్వబోతుందని ఊహాగానాలు వినవస్తున్నాయి.

బహుశా, అందుకే వర్మ తెలివిగా ‘టైగర్‌ కేసీఆర్‌’ అంటూ కేసీఆర్‌ని హీరోగా చూపించేందుకు తద్వారా తన ‘కోబ్రా’ సినిమాకి ఇబ్బందులు లేకుండా చూసుకునేందుకు ప్రయత్నిస్తున్నట్లు కన్పిస్తోంది. ఇలాంటి తెలివితేటలు రామ్‌గోపాల్‌ వర్మకి కాక ఇంకెవరికి వస్తాయి? అయితే, కేసీఆర్‌ని ఇప్పుడెంతగా వర్మ పొగిడినా, ఒక్కసారి విమర్శ అంటూ చేస్తే ఆ తర్వాత కేసీఆర్‌ అభిమానుల నుంచి వర్మకి ఎదురయ్యే తలనొప్పి ఓ రేంజ్‌లో వుంటుంది.

‘ఆడు’ అని ‘టైగర్‌ కేసీఆర్‌’ టైటిల్‌ లుక్ లో ప్రస్తావించడంతోనే కేసీఆర్‌ అభిమానుల నుంచి తీవ్ర వ్యతిరేకతను ఎదుర్కొన్నారు వర్మ. ఏదో తల తిక్క లాజిక్‌ ఒకటి చెప్పి, వర్మ ఇప్పటికి గండం తప్పించుకున్నానని అనుకోవచ్చుగాక. కానీ ‘ఆడు’ అనే మాట విషయంలో కేసీఆర్‌ అభిమానులు సంతృప్తిగా లేరు. చంద్రబాబుని విమర్శించినట్టుండదు, కేసీఆర్‌ని విమర్శిస్తే పరిస్థితి.