స్ట్రెయిట్ తెలుగు సినిమాని డబ్బింగ్ సినిమాలు కలెక్షన్ల పరంగా దెబ్బ కొట్టడం అనేది కొత్త విషయం కాదు. అయితే ‘కాంచన-3’ లాంటి ఓ మాస్ హర్రర్ కామెడీ, ‘జెర్సీ’ లాంటి ఓ మంచి సినిమాపై ‘వసూళ్ళ దెబ్బ’ వేయడం చాలామంది సినీ జనాలకు నచ్చడంలేదు. డాన్స్ కొరియోగ్రాఫర్, దర్శకుడు, నటుడు లారెన్స్ నటించిన ‘కాంచన-3’ సినిమాకి తొలి రోజు మరీ అంత మంచి రేటింగ్స్ రాలేదుగానీ, వసూళ్ళ పరంగా మాత్రం సత్తా చాటుతోంది. ‘జెర్సీ’ సినిమాకి అదిరిపోయే రేటింగ్స్ వచ్చినా ఆ రేటింగ్స్కి తగ్గ వసూళ్ళు సాధించడంలో కొంత వెనుకబడుతున్నట్లు కన్పిస్తోంది.
తొలి వీకెండ్ ముగిసింది. ‘కాంచన-3’ పోటీలో లేకపోయి వుంటే, ‘జెర్సీ’ సినిమా తొలి వీకెండ్లో అదిరిపోయే వసూళ్ళను సొంతం చేసుకునేదని ట్రేడ్ వర్గాలు అభిప్రాయపడుతున్నాయి. ‘జెర్సీ’కి ఇప్పుడు వచ్చిన వసూళ్ళు బాగానే వున్నా, ఈ జోరు సరిపోదనీ, ఇంతకు మించిన జోరు ప్రదర్శిస్తేనే ప్రీ రిలీజ్ బిజినెస్ని మ్యాచ్ చేసేలా ఫైనల్ ఫిగర్స్ వుంటాయని అయితే అది సాధ్యమయ్యేలా కనిపించడంలేదని ఓ ట్రేడ్ పండితుడు అభిప్రాయపడ్డాడు. ఈ ఏడాది ఇప్పటిదాకా అత్యధిక రేటింగ్స్ సాధించిన సినిమా ఏదన్నా వుందంటే అది ‘జెర్సీ’ మాత్రమేనని వారు గుర్తు చేస్తున్నారు.
సంక్రాంతికి విడుదలైన ‘ఎఫ్-2’ (ఫన్ అండ్ ఫ్రస్ట్రేషన్) ఈ ఏడాది అత్యధిక వసూళ్ళను సాధించిన సినిమా. దానికి సైతం ఓ మోస్తరు రేటింగ్స్ మాత్రమే రావడం చూశాం. అలాంటి వసూళ్ళ సినిమా మళ్ళీ టాలీవుడ్కి ఏప్రిల్లోనే దొరికే అవకాశముంది. అయితే, ఏప్రిల్ మాత్రం తెలుగు సినిమాకి మంచి కళ తీసుకొచ్చింది. ‘మజిలీ’ సినిమా మంచి విజయాన్ని అందుకుంది, అదీ యావరేజ్ రేటింగ్స్తోనే. ‘చిత్రలహరి’ కూడా చెప్పుకోదగ్గ విసయాన్నే సాధించింది, ఇక్కడా రేటింగ్స్ గొప్పగా ఏం లేవు.
నాగచైతన్య కెరీర్లోనే బెస్ట్ ఫిలింగా మారింది ‘మజిలీ’. ‘చిత్రలహరి’ సైతం ఇటీవలి కాలంలో సాయిధరమ్ తేజ్కి అతి పెద్ద విజయంగా చెప్పుకోవాల్సి వుంటుంది. ‘జెర్సీ’ రాకతో ‘మజిలీ’కి కొంత ఉత్సాహం పెరిగితే, ఆ ఎఫెక్ట్తో ‘చిత్రలహరి’ కొంత వెనుకబడింది. ‘కాంచన-3’ విషయానికొస్తే, బి మరియు సి కేంద్రాల్లో వసూళ్ళ పరంగా సంచలనాలే సృష్టిస్తోంది ఈ హర్రర్ కామెడీ. తొలి వీకెండ్ ముగిసిన తర్వాత, రూరల్ ఏరియాస్లో ‘జెర్సీ’ని ‘కాంచన’ అధిగమించినా ఆశ్చర్యపోనక్కర్లేదంటున్నారు.
కొంత భయం, ఇంకొంత గ్లామర్, దానికి తోడు కామెడీ ఇవన్నీ రిపీట్ ఆడియన్స్ని రప్పిస్తున్నాయనీ, అదే ‘కాంచన-3’కి కాసుల వర్షం కురిపిస్తోందని నిస్సందేహంగా చెప్పొచ్చు. ‘జెర్సీ’ సహా మిగిలిన రెండు ఏప్రిల్ రిలీజ్లూ ఎమోషనల్ పాయింట్తో అల్లుకున్న కథలే. దాంతో, రిపీట్ ఆడియన్స్ స్ట్రెయిట్ తెలుగు సినిమాలకంటే, డబ్బింగ్ సినిమా వైపుకే కనిపిస్తున్నారు.
ఏదిఏమైనా, ‘మజిలీ’తోపాటు ‘చిత్రలహరి’ కూడా సేఫ్ జోన్లోకి వెళ్ళిపోయిన దరిమిలా, ‘జెర్సీ’ ఇప్పుడు ఆ జోన్లోకి ఎంటర్ అవ్వాల్సింది. అయితే ‘కాంచన-3’ అందుకు ప్రతిబంధకంగా మారిన దరిమిలా, మంచి సినిమాని ప్రేక్షకులు గట్టెక్కిస్తారా? లేదంటే డబ్బింగ్ సినిమాతోనే పండగ చేసుకోవడంలోనే మునిగి తేలుతారా? అనే ప్రశ్నలకు సమాధానం వీకెండ్ ముగిశాక తొలి రోజు అయిన నేటి సాయంత్రానికే దొరకవచ్చు.