కనగరాజు నియామకం వెనుక మర్మమేంటి?

పలు అంశాల్లో కొరకరాని కొయ్యగా మారిన నిమ్మగడ్డ రమేశ్ కుమార్ ను రాష్ట్ర ఎన్నికల కమిషనర్ పోస్టు నుంచి అనూహ్యంగా తప్పించిన ఏపీ సర్కారు.. ఆ స్థానంలో తమిళనాడుకు చెందిన హైకోర్టు మాజీ న్యాయమూర్తి జస్టిస్ కనగరాజును కొత్త ఎస్ఈసీగా నియమించింది. కరోనాతో అంతా అతలాకుతలమవుతున్న తరుణంలో ఇంత అనూహ్యంగా ఎస్ఈసీ మార్పులో ఆంతర్యం ఏమిటి?

పైగా రాష్ట్రానికి సంబంధం లేని వ్యక్తిని తీసుకొచ్చి ఆ పదవిలో ఎందుకు కూర్చోబెట్టారు అనే అంశాలు చర్చనీయాంశమయ్యాయి. నిజానికి తమతో సంప్రదించకుండా స్థానిక ఎన్నికలను వాయిదా వేసిన రమేశ్ కుమార్ పై జగన్ తీవ్ర ఆగ్రహం వ్యక్తంచేశారు. ఆయన నిర్ణయంపై సుప్రీంకోర్టుకు కూడా వెళ్లారు. అయితే, వాయిదాని సమర్థించిన సుప్రీంకోర్టు.. ఎన్నికల కోడ్ ఎత్తివేయాలని, మళ్లి ఎన్నికల నిర్వహణపై ప్రభుత్వంతో సంప్రదింపులు జరిపిన తర్వాతే నిర్ణయం తీసుకోవాలని సూచించింది.

అనంతరం ఎస్ఈసీ వర్సెస్ ప్రభుత్వం అన్న తరహాలో పరిస్థితులు కొనసాగుతున్నాయి. కరోనా నేపథ్యంలో ప్రభుత్వం ప్రకటించిన ఆర్థిక సాయాన్ని వైఎస్సార్ సీపీకి చెందిన ఎంపీటీసీ అభ్యర్థుల చేత పంపిణీ చేయించారనే ఆరోపణలు వచ్చాయి. దీనిపై చర్య తీసుకోవాలని టీడీపీ అధినేత చంద్రబాబు ఎస్ఈసీకి లేఖ రాశారు. దీనిపై చర్యలు తప్పవని వైసీపీ నేతలతో అన్నట్టు తెలిసింది.

ఈ నేపథ్యంలోనే ఇక రమేశ్ విషయంలో జాప్యం చేయడం అనవసరమని నిర్ణయం తీసుకున్నట్టు సమాచారం. వాస్తవానికి ఆయన్ను తొలగించాలని గతంలోనే నిర్ణయం తీసుకున్నారు. దీనికి సంబంధించి అందుబాటులో ఉన్న మార్గాలను అన్వేషిస్తున్నారు. అయితే, కరోనా ఉధృతి సద్దుమణిగిన తర్వాత చర్యలు ఉంటాయని పలువురు భావించారు. కానీ సర్కారు అనూహ్యంగా నిర్ణయం తీసుకుంది.

రమేశ్ తొలగింపు న్యాయస్థానాల్లో నిలబడుతుందా లేదా అనే విషయాన్ని పక్కనపెడితే ప్రభుత్వం మాత్రం పక్కా వ్యూహంతోనే ముందుకెళ్లినట్టు తెలుస్తోంది. అటు రమేశ్ తొలగింపు, ఇటు జస్టిస్ కనగరాజు నియామకం అంతా ఆగమేఘాలపై జరిగిపోయింది. ఒకవేళ ఈ విషయంలో కోర్టుకు వెళ్లినా.. ఇప్పట్లో తెగే అవకాశం ఉండదనే అభిప్రాయాలు వ్యక్తమవుతున్నాయి. ఈలోగా రమేశ్ పదవీకాలం ముగిసిపోతుందనేది సర్కారు భావనగా తెలుస్తోంది. మరి న్యాయస్థానం ఎలా స్పందిస్తుందో చూడాలి.