Jr Ntr Birthday specials: కెరీర్లో ఎత్తుపల్లాలు ఏ నటుడికైనా సహజమే. జూనియర్ ఎన్టీఆర్ కూడా అలాంటి పరిస్థితి చూసిన హీరోనే. అయితే.. కెరీర్ సక్సెస్ ట్రాక్ ఎక్కడానికి కావల్సిన ఒక్క సినిమా కోసం చూశాడు ఎన్టీఆర్. తనలోని ఎనర్జీని మొత్తం బయటకు తీసేలా చేసి హిట్ కొట్టిన ఆ సినిమా టెంపర్. పూరి జగన్నాధ్ తొలిసారి వేరే రచయిత (వక్కంతం వంశీ) కథను తెరకెక్కించి ఎన్టీఆర్ లోని ఫుల్ యాక్షన్ ను బయటకు తీశాడు. నెగటివ్ షేడ్స్ నుంచి పాజిటివ్ యాంగిల్ లోకి మారే హీరో కథలో ఎన్టీఆర్ నటించాడు. జీప్ వద్ద నిలబడి గన్ స్టయిల్ గా తిప్పే సన్నివేశం, పోలిస్ స్టేషన్ సీన్, క్లైమాక్స్ లో నట విశ్వరూపమే చూపాడని చెప్పాలి. అక్కడి నుంచి ఎక్కిన హిట్ ట్రాక్ కొన్నేళ్లుగా కొనసాగుతూనే ఉంది.
మాస్ & క్లాస్ పాత్రల్లో..
సుకుమార్ దర్శకత్వంలో సినిమా అంటే స్కూలుకెళ్లి పాఠాలు నేర్చుకున్నట్టే. నాన్నకు ప్రేమతో సినిమాతో అదే జరిగింది. ఎమోషన్ సన్నివేశాల్లో ఎన్టీఆర్ కు ఎంత పట్టుందో నిరూపించిన సినిమా. తమ పరిస్థితికి కారణమైన వ్యక్తిని తెలివిగా ఢీకొట్టే పాత్రలో ఎంతో స్టయిలిష్ గా నటించి క్లైమాక్స్ లో తన పెర్ఫార్మెన్స్ తో సినిమాను రక్తి కట్టించాడు. కొరటాల శివ దర్శకత్వంలో తెరకెక్కిన జనతా గ్యారేజ్ సినిమాలో కూడా యూత్ ని ప్రభావితం చేసే పాత్రలో నటించి మెప్పించాడు. పర్యావరణంపై అవగాహన కల్పించే సున్నితమైన వ్యక్తి.. వ్యవస్థలో చెడుపై తిరగబడే పవర్ ఫుల్ పాత్రలో ఫ్యాన్స్ ఆడియన్స్ ను మెప్పించాడు. ఎమోషన్స్, సెంటిమెంట్ సన్నివేశాల్లో తనకున్న పట్టును ఈ సినిమాతో మరోసారి చూపాడు ఎన్టీఆర్. ప్రస్తుతం కొరటాల శివతో ఫుల్ మాస్ కథలో నటిస్తున్నాడు ఎన్టీఆర్.
త్రిపాత్రాభినయం & అచ్చొచ్చిన రాయలసీమ..
ఎన్టీఆర్ తొలిసారి త్రిపాత్రాభినయం చేసిన సినిమా జైలవకుశ. మాస్, అమాయత్వం, కామెడీ పాత్రల్లో ఎన్టీఆర్ తన పెర్ఫార్మెన్స్ పవర్ ఏంటో చూపాడు. కోరమీసంతో చేసిన పవర్ ఫుల్ పాత్ర ఎన్టీఆర్ కు ఆడియన్స్ లో మంచి రెస్పాన్స్ వచ్చింది. తన మార్క్ కామెడీ టైమింగ్, అమాయకంగానూ నటించాడు. ఇక త్రివిక్రమ్ దర్శకత్వంలో వచ్చిన అరవింద సమేత వీరరాఘవ సినిమా.. ఎన్టీఆర్ ఫ్యాన్స్ కు ఫుల్ మీల్సే అయింది. సినిమా ప్రారంభంలోనే వచ్చిన భారీ యాక్షన్ ఎపిసోడ్ లో ఎన్టీఆర్ కాదు.. వీరరాఘవుడే కనిపిస్తాడు. ఎంతో పవర్ ఫుల్ పాత్రను సినిమా ఆద్యంతం తనదైన నటనతో మెప్పించాడు. అచ్చొచ్చిన రాయలసీమ బ్యాక్ డ్రాప్ లో ఎన్టీఆర్ తన మార్క్ మాస్ ఏంటో చూపించి తన సక్సెస్ ట్రాక్ కంటిన్యూ చేశాడు.