ఓటిటి రివ్యూ: గుంజన్ సక్సేన – ది కార్గిల్ గర్ల్ : ఓకే ఓకే బయోపిక్.!

1999లో ఇండియా – పాక్ మధ్య జరిగిన కార్గిల్ వార్ లో తన వీరోచిత రెస్క్యూ ఆపరేషన్స్ తో ‘ది కార్గిల్ గర్ల్’ గా పేరు తెచ్చుకున్న ఇండియన్ ఎయిర్ ఫోర్స్ తొలి మహిళా పైలట్ గుంజన్ సక్సేనా జీవితం ఆధారంగా రూపొందించిన సినిమా ‘గుంజన్ సక్సేనా – ది కార్గిల్ గర్ల్’. జాహ్నవి కపూర్ ప్రధాన పాత్రలో నటించిన ఈ సినిమా థియేటర్ రిలీజ్ కోసం సిద్దమైనప్పటికీ కరోనా పాండెమిక్ వలన ఓటిటి ద్వారా నెట్ఫ్లిక్స్ లో రిలీజయింది. మరి ఈ బయోపిక్ ఎలా ఉందో ఇప్పుడు చూద్దాం..

కథ:

గుంజన్ సక్సేనా(జాహ్నవి కపూర్) చిన్నప్పటి నుంచే పైలట్ అవ్వాలని కలలు కంటుంది. తన ఆలోచనని అనూప్ సక్సేనా(పంకజ్ త్రిపాఠి) సపోర్ట్ చేస్తాడు. పైలర్ అవ్వడం కోసం కావాల్సిన చదువును కూడా పూర్తి చేస్తుంది. కానీ ఫైనాన్షియల్ గా ట్రైనింగ్ ఫీజ్ ని భరించలేక డ్రాప్ అవుతుంది. అప్పుడే ఇండియన్ ఎయిర్ ఫోర్స్ మొదటి సారి మహిళా పైలట్స్ కోసం ఓపెనింగ్స్ మొదలు పెడుతుంది. ఎంట్రన్స్ టెస్ట్ లో వందల మంది పాల్గొనగా ఒకే ఒక్క అమ్మాయి సెలక్ట్ అవుతుంది, తనే గుంజన్ సక్సేనా.. ఇక అక్కడి నుంచి కార్గిల్ వార్ వరకూ తన జర్నీ ఎలా సాగింది? అంతమంది ఉన్న జెంట్స్ ఎయిర్ ఫోర్స్ లో మొదటి విమెన్ గా ఎలాంటి ఇబ్బందులు ఎదుర్కొంది? అనేదే కథ.

తెర మీద స్టార్స్..

జాహ్నవి కపూర్ కి ఇది రెండవ సినిమా.. కానీ పర్ఫెక్ట్ గా గుంజన్ సక్సేనా పాత్రలో మెప్పించారు. ముఖ్యంగా ఫాదర్ – డాటర్ మరియు ట్రైనింగ్ క్యాంపులో వచ్చే ఎమోషనల్ సీన్స్ లో అద్భుతంగా నటించింది. రెండవ సినిమాతో తనలోని టాలెంట్ ని ప్రూవ్ చేసుకోవడానికి వచ్చిన ఈ అవకాశాన్ని అద్భుతంగా ఉపయోగించుకుంది. ఫాదర్ పాత్రలో పంకజ్ త్రిపాఠి పాత్ర చాలా బాగా చేసాడు. అంగద్ బేడీ, వినీత్ కుమార్ సింగ్, మానవ్ విజ్ లు కూడా మంచి సపోర్టింగ్ పాత్రల్లో మెరిశారు.

తెర వెనుక టాలెంట్..

కథ పరంగా చూసుకుంటే… ఇది ఎయిర్ ఫోర్స్ ఆఫీసర్ గుంజన్ సక్సేనా బయోపిక్.. ఈ బయోపిక్ లో డైరెక్టర్ ఎక్కువగా మొదటి మహిళ ఎయిర్ ఫోర్స్ ఆఫీసర్ గా గుంజన్ సక్సేనా పేస్ చేసిన ప్రాబ్లెమ్స్ గురించి ఎక్కువగా చూపించారు కానీ తన హీరోయిక్ మూమెంట్స్ అలా చూపించి ఫినిష్ చేసేయడం వలన కథని ముగించిన విధానం కాస్త సంతృప్తిని ఇవ్వదు. తన జర్నీలో కొన్ని సీన్స్ ని కూడా డ్రాగా చేసినట్టు అనిపిస్తుంది. కథనం పరంగా కూడా చాలా సన్నివేశాల్లో హై మోమెంట్స్ కి తీసుకెళ్లే అవకాశం ఉన్నప్పటికీ చాలా సింపుల్ గా తీసుకెళ్లిపోయారు. డైరెక్టర్ కూడా ఉన్న కథని బాగానే తీశారు.. కానీ ఒక హీరోయిక్ లేడీ కథని చెబుతున్నప్పుడు ఆమె పడిన స్ట్రగుల్ తో పాటు తను ఫైట్ చేసిన తీరుని కూడా పలు సీన్స్ తో పాటు తను పేస్ చేసిన అత్యంత కష్టతరమైన మిషన్ ని కూడా చూపించి చివరికి ఓ మంచి కిక్ వచ్చేది. కానీ అది మిస్ అవ్వడం వలన కొంత అసంతృప్తి ఉండిపోతుంది.

మిగిలిన టెక్నికల్ టీం పరంగా చూసుకుంటే.. మనుష్ నందన్ నందన్ సినిమాటోగ్రఫీ బాగుంది. అమిత్ త్రివేది పాటలు బాగున్నాయి.. కానీ బ్యాక్ గ్రౌండ్ మ్యూజిక్ మాత్రం చెప్పుకునే స్థాయిలోలేదు . జాన్ స్టీవర్ట్ ఇంకొంచం బెటర్ బ్యాక్ గ్రౌండ్ స్కోర్ స్కోర్ ఇవ్వాల్సింది. ఆర్ట్ వర్క్ అండ్ సిజి వర్క్ కూడా డీసెంట్ గా ఉన్నాయి.

విజిల్ మోమెంట్స్:

– జాహ్నవి కపూర్ నటన
– ఎమోషనల్ సీన్స్
– మహిళా సాధికారత గురించి చెప్పిన విధానం

బోరింగ్ మోమెంట్స్:

– సాగదీసి సీన్స్
– బెటర్ గా ఉండాల్సిన స్క్రీన్ ప్లే
– క్లైమాక్స్ సడన్ గా ముగించేయడం

విశ్లేషణ:

ఇండియన్ ఎయిర్ ఫోర్స్ తొలి మహిళా పైలట్ గుంజన్ సక్సేనా జీవిత కథ ఎందరికో స్ఫూర్తి, ఆవిడ కథ ద్వారా మహిళల్లో ఇంకా స్ఫూర్తిని నింపేలా కొన్ని సీన్స్ ని చాలా బాగా చేశారు. కానీ సినిమా పరంగా చూస్తున్నప్పుడు కథతో పాటు ఆడియన్స్ ని ఆధ్యంతం కూర్చోపెట్టే విధంగా కథని తెరపై చూపడంలో కొంతవరకూ విఫలమయ్యారు. టైటిల్ అండ్ పోస్టర్ పరంగా వార్ ఎపిసోడ్స్ అవీ ఇవీ ఉంటాయి అనుకుంటే మాత్రం నిరాశ పడతారు. ఓవరాల్ గా గుంజన్ సక్సేనా అక్కడక్కడా మంచి ఫీల్ ఇస్తుంది, అక్కడక్కడా సాగదీత అనే ఫీలింగ్ ని ఇస్తుంది.

చూడాలా? వద్దా?: బయోపిక్ సినిమాలు ఇష్టపడే వారు హ్యాపీగా చూడచ్చు.

తెలుగుబులెటిన్.కామ్ రేటింగ్ : 2.5/5