రాష్ట్రంలో మొత్తం 175 నియోజకవర్గాలు. అందులో, జనసేన పోటీ చేస్తున్నది 21 నియోజకవర్గాలు. ఇది అసెంబ్లీ లెక్క. బీజేపీ ఎన్ని సీట్లలో పోటీ చేస్తోంది.? టీడీపీ ఎన్ని సీట్లలో పోటీ చేస్తోంది.? వీటి కంటే, జనసేన పోటీ చేస్తున్న 21 నియోజకవర్గాల్లో గ్రౌండ్ లెవల్ పరిస్థితిపై ఎప్పటికప్పుడు వైసీపీ లెక్కలు తెప్పించుకుంటోంది.
టీడీపీ కూడా, జనసేన పోటీ చేస్తున్న సీట్లన్నీ ఆ పార్టీ గెలిచేలా, స్థానికంగా టీడీపీ శ్రేణులు జనసేన పార్టీకి పూర్తిగా సహకరించే దిశగా వ్యూహాత్మకంగా అడుగులేస్తోంది. ‘జనసేన పార్టీని గెలిపించుకోవాల్సిన బాధ్యత మన మీదనే వుంది..’ అని పదే పదే టీడీపీ అధినేత నారా చంద్రబాబునాయుడు చెబుతున్నారు.
బీజేపీ ఈ విషయంలో కొంచెం మీనమేషాల్లెక్కెడుతోందిగానీ, టీడీపీ పోటీ చేస్తోన్న అన్ని నియోజకవర్గాల్లో జనసేన పార్టీ నుంచి పూర్తిస్థాయిలో ఓటు ట్రాన్స్ఫర్ జరగాలని జనసేన అధినేత పవన్ కళ్యాణ్ కూడా పిలుపునిస్తున్నారు.
టీడీపీలో కొందరు నెటిజనం, సోషల్ మీడియా వేదికగా జనసేనను కవ్విస్తున్నా గ్రౌండ్ లెవల్లో మాత్రం టీడీపీ – జనసేన కలిసి పనిచేస్తున్నాయి. ప్రధానంగా పిఠాపురం నియోజకవర్గంలోనూ, నిడదవోలు, తాడేపల్లి గూడెం తదితర నియోజకవర్గాల్లోనూ.. జనసేన పోటీ చేస్తున్న మిగతా నియోజకవర్గాల్లోనూ ఇదే పరిస్థితి స్పష్టంగా కనిపిస్తోంది.
జనసేనాని గతంలో ప్రకటించిన 98 శాతం స్ట్రైక్ రేట్ కాస్తా, ఇప్పుడు 100 శాతం స్ట్రైక్ రేట్ వరకు చేరుకునేలా పరిస్థితులు మారాయి. ఒక్కటంటే ఒక్క ఓటు కూడా, టీడీపీ – జనసేన – బీజేపీ దాటి బయటకు వెళ్ళకూడదన్న దిశగా మూడు పార్టీలు కలిసి పనిచేస్తున్నాయి.
బీజేపీలోనూ కొందరు నేతలు ఇప్పుడిప్పుడే సర్దుకుంటున్నారు. ఒకటి నుంచి రెండు శాతమే ఓట్లు బీజేపీకి వున్నా, ఇప్పుడున్న పరిస్థితుల్లో అది కూడా కీలకమే. అందుకే, బీజేపీని సైతం మరింతగా కలుపుకుపోవాలని టీడీపీ – జనసేన భావిస్తున్నాయి.
ప్రధాని మోడీ నిన్నటి పర్యటన తర్వాత ఏపీ బీజేపీలో గందరగోళం పూర్తిగా తొలగిపోయింది. టీడీపీ కంటే ఎక్కువగా జనసేనకు ఆయా నియోజకవర్గాల్లో బీజేపీ మద్దతివ్వనుంది. జనసేన ఓట్లు బీజేపీకి కూడా అంతే అవసరం. మరీ ముఖ్యంగా పార్లమెంటు స్థానాల్లో.
మన కోసం జనసేన త్యాగం చేసిందన్న భావన బీజేపీ లోక్ సభ అభ్యర్థుల్లో వుంది. ఆ కారణంగా బీజేపీలో కొందరు కీలక నేతలు, జనసేన పార్టీకి పూర్తిస్థాయిలో మద్దతిస్తున్నారు. జనసేనతోపాటు టీడీపీ వైపుకు కూడా బీజేపీ ఓటు బ్యాంకు మళ్ళనుంది పొత్తు ధర్మంలో భాగంగా.
ఈ ఐక్యతను దెబ్బ కొట్టేందుకు, వైసీపీ సోషల్ మీడియా వేదికగా వేస్తున్న చిల్లర వేషాలు అన్నీ ఇన్నీ కావు.!