రైతు భరోసా.. జనసేన డిమాండ్‌ ఇదీ.!

చంద్రబాబు హయాంలో ఏ సంక్షేమ పథకం తెరపైకొచ్చినా, అందులో లోటు పాట్లను అప్పటి ప్రతిపక్షం వైఎస్సార్సీపీ వెతకడం.. వెతికి యాగీ చేయడం చూశాం. రాజకీయాలన్నాక ఇలాంటివి మామూలే. వైఎస్‌ జగన్‌ మోహన్‌రెడ్డి ప్రభుత్వం కూడా ఇప్పుడు ‘కొర్రీలు’ పెడుతూ సంక్షేమ పథకాల్ని సరికొత్తగా తెరపైకి తెస్తోంది.

నిజానికి రాష్ట్ర ఆర్థిక పరిస్థితుల్ని దృష్టిలో పెట్టుకుని ఆలోచించేవారికి.. ఈ కొర్రీలు పెద్దగా కన్పించవు. కానీ, ఎన్నికల్లో హామీ ఇచ్చాక దాన్ని నెరవేర్చడమే లక్ష్యంగా పనిచేస్తామని చెబుతూ.. పార్టీ మేనిఫెస్టోని బైబిల్‌గా చెప్పుకుంటున్న వైఎస్‌ జగన్‌మోహన్‌రెడ్డి, మాట తప్పితే ఎలా.? ఇదే విషయాన్ని జనసేన పార్టీ కూడా ప్రశ్నిస్తోంది. రైతులకు 12,500 రూపాయలు పెట్టుబడి సాయాన్ని రైతు భరోసాగా అందిస్తామని వైఎస్‌ జగన్‌ మోహన్‌రెడ్డి ఎన్నికల ప్రచారంలో చెప్పారు.. మేనిఫెస్టోలోనూ ప్రస్తావించారు.

మరోపక్క కేంద్రం, రైతులకి 6 వేల రూపాయలు పెట్టుబడి సాయాన్ని గతంలోనే ప్రకటించింది. ఆ లెక్కన మొత్తం 18,500 రూపాయలు ఒక్కో రైతుకీ రాష్ట్ర ప్రభుత్వం ఇచ్చి తీరాలి. కానీ, 13,500 రూపాయలతో సరిపెట్టేస్తోంది వైఎస్‌ జగన్‌ సర్కార్‌. రైతుకి ఏ కాస్త సాయం ప్రభుత్వం నుంచి అందినా అది గొప్ప విషయంగా మారిపోయింది. వాస్తవమేంటంటే.. రైతుకి లక్ష రూపాయలు ప్రభుత్వం ఇచ్చినా అది తక్కువే. రైతు అవసరాలు అలాంటివి.

కానీ, గ్రామ వాలంటీర్ల పేరుతో పార్టీ కార్యకర్తలకు నెలకు 5 వేల రూపాయలు సమర్పించుకుంటున్న జగన్‌ సర్కార్‌, రైతుకి మాత్రం ఏడాదికి 13,500 రూపాయలు.. అంటే నెలకి వెయ్యి రూపాయలకు కాస్త అటూ ఇటూగా మాత్రమే అందిస్తుండడాన్ని ఎలా అర్థం చేసుకోవాలి.? గ్రామ వాలంటీర్లు అధికార పార్టీ కోసం పనిచేస్తారు.. రైతులు అలా పని చేయాలన్న రూల్‌ లేదు కదా.. అదీ అసలు సంగతి.. అనుకోవాలేమో.

ఇక, 86 లక్షల మందికి అందాల్సిన రైతు భరోసాని సగం మందికే ఎలా పరిమితం చేస్తారని జనసేన పార్టీ ప్రశ్నిస్తోంది. రైతు భరోసా కింద ఇచ్చే మొత్తాన్ని మూడు విడతలుగా కాకుండా, రెండు విడతల్లోనే ఇవ్వాలన్నది జనసేన తెరపైకి తెచ్చిన మరో డిమాండ్‌. మరి, జనసేన డిమాండ్లపై అధికార పక్షం ఏమంటుందో వేచి చూడాల్సిందే.