‘దాదా’గిరీని విరాట్‌ కోహ్లీ తట్టుకోగలడా.?

ఇటీవలి వన్డే వరల్డ్‌ కప్‌ పోటీల్లో అంబటి తిరుపతిరాయుడు ఎందుకు చోటు దక్కించుకోలేకపోయాడు.? జట్టు యాజమాన్యం అంబటి స్థానంలో రిషబ్‌ పంత్‌నీ, ఇంకొకర్నీ ఎందుకు ప్రయత్నించింది.? జట్టు ప్రయోజనాల్ని పణంగా పెట్టి మరీ, క్రికెట్‌లో రాజకీయాల్ని పెంచి పోషిస్తున్నదెవరు.? క్రికెట్‌ అంటేనే రాజకీయం.. రాజకీయం అంటేనే క్రికెట్‌ అనే స్థాయికి క్రికెట్‌లో విలువలు దిగజారిపోయిన మాట వాస్తవం.

మాజీ క్రికెటర్‌ అనిల్‌ కుంబ్లే, జట్టు మేనేజ్‌మెంట్‌లో వుండడం నచ్చని విరాట్‌ కోహ్లీ, అప్పట్లో జట్టు ప్రయోజనాల్ని పణంగా పెట్టాడు. అలా కుంబ్లే, కోచ్‌ పదవిని వదులుకోవాల్సి వచ్చింది. ఎవరు ఔనన్నా ఎవరు కాదన్నా ఇదీ వాస్తవం. ఇలాంటి విషయాల్లో కోహ్లీకి సరిజోడీ ఎవరు.? అంటే, ఠక్కున గుర్తుకొచ్చే పేరు సౌరవ్‌ గంగూలీనే.

టీమిండియాకి ‘గెలుపు కసి’ నేర్పించిన కెప్టెన్‌గా గంగూలీకి వున్న పేరు ప్రఖ్యాతులు అన్నీ ఇన్నీ కావు. ఆ గంగూలీ ఇప్పుడు బీసీసీఐ అధ్యక్షుడిగా మారుతున్నాడు. సో, ఇది ఖచ్చితంగా విరాట్‌ కోహ్లీకి పెద్ద దెబ్బ. కోహ్లీకి మాత్రమే కాదు.. రవి శాస్త్రికి కూడా ముందు ముందు సౌరవ్‌ గంగూలీ నుంచి తిప్పలు తప్పవు. ఎందుకంటే కోహ్లీ – రవిశాస్త్రిల వేవ్‌ లెంగ్త్‌ ఒక్కటే.

క్రికెట్‌ విశ్లేషకుల అంచనా ప్రకారం, రానున్న రోజుల్లో చాలా మార్పులు భారత క్రికెట్‌లో చోటు చేసుకోబోతున్నాయి. అవి ఖచ్చితంగా విరాట్‌ కోహ్లీ ఆట తీరుపైనా, టీమిండియా ఆట తీరుపైనా ప్రభావం చూపబోతున్నాయి. విరాట్‌ కోహ్లీకి ఆల్టర్‌నేట్‌ టీమిండియాకి రోహిత్‌ శర్మ రూపంలో వుండనే వుంది. ఆ రోహిత్‌ శర్మకి జట్టు యాజమాన్యంతో పెద్దగా విభేదాల్లేవు. విరాట్‌ కోహ్లీలా వివాదాస్పద అంశాల జోలికి రోహిత్‌ శర్మ వెళ్ళడు.

అయితే, ఇప్పుడున్న పరిస్థితుల్లో విరాట్‌ కోహ్లీని సౌరవ్‌ గంగూలీ ‘వెంటనే’ కెలికేస్తాడని అనుకోలేం. కానీ, ఖచ్చితంగా కెలుకుతాడు గంగూలీ. ఒక వేళ గంగూలీ కెలక్కపోయినా.. విరాట్‌ కోహ్లీ ఖాళీగా కూర్చోడు.. వివాదాన్ని రాజేస్తాడు. మరి, గంగూలీ టాప్‌ మోస్ట్‌ పవర్‌లో వున్నప్పుడు, విరాట్‌ కోహ్లీ ఆటలు చెల్లుతాయా.? గంగూలీకి కోపమొస్తే విరాట్‌ కోహ్లీ తట్టుకోగలడా.? కష్టమే.!