మోడీకి వంగి వంగి దండాలెట్టాలా వైఎస్‌ జగనూ!

ఎందుకంటే, నరేంద్ర మోడీ పాలనను ఆంధ్రప్రదేశ్‌ ప్రజానీకం ముక్త కంఠంతో తిరస్కరించింది. భారతీయ జనతా పార్టీకి ఒక్క అసెంబ్లీ సీటుగానీ, ఒక్క పార్లమెంటు సీటుగానీ తాజా ఎన్నికల్లో దక్కలేదు. ఓటు బ్యాంకు కూడా గతంతో పోల్చితే దారుణంగా పడిపోయింది. ప్రత్యేక హోదా ఇస్తామని చెప్పి, బీజేపీ ఆంధ్రప్రదేశ్‌ ప్రజల్ని వంచించింది మరి. నరేంద్ర మోడీ మాట ఇచ్చి తప్పారంటూ గతంలో వైఎస్‌ జగన్‌ మోహన్‌ రెడ్డి విమర్శించారు కూడా. ఆ కారణంగానే నరేంద్ర మోడీ ప్రభుత్వంపై వైఎస్సార్‌ కాంగ్రెస్‌ పార్టీ గతంలో అవిశ్వాస తీర్మానం కూడా ప్రవేశ పెట్టింది పార్లమెంటు సాక్షిగా. కానీ, ఎప్పుడైతే నరేంద్ర మోడీ ఎదుటపడ్డారో వైఎస్‌ జగన్‌ తన ‘స్వామి భక్తి’ ప్రదర్శించకుండా వుండలేకపోయారు.

నరేంద్ర మోడీ పాదాలకు నమస్కరించేందుకు వైఎస్‌ జగన్‌ ప్రయత్నించారు. కానీ, ప్రధాన మంత్రి నరేంద్ర మోడీ, వైఎస్‌ జగన్‌ ప్రయత్నాల్ని అడ్డుకున్నారు. అయినా, జగన్‌ ఆగలేదాయె! ఒకటికి రెండు సార్లు ఆ ప్రయత్నం చేశారు. అఫ్‌కోర్స్‌, వైఎస్‌ జగన్‌కి ఆ ఛాన్స్‌ నరేంద్ర మోడీ కూడా ఇవ్వలేదు. ఆరు కోట్ల మంది ఆంధ్రప్రదేశ్‌ ప్రజల ఆత్మగౌరవం ఇప్పుడు బిక్కచచ్చిపోయినట్లయ్యింది ఈ ఉదంతంతో. జగన్‌ నమస్కారాన్ని మోడీ హుందాగా స్వీకరిస్తే అదొక లెక్క. ఒకసారి కాదు, ఒకటికి రెండు సార్లు జగన్‌ ప్రయత్నం చేయడమేంటి? నరేంద్ర మోడీ వద్దనడమేంటి? నరేంద్ర మోడీ వద్దంటున్నా, వైఎస్‌ జగన్‌ ‘ఎట్టి పరిస్థితుల్లోనూ పాదాలు తాకి తీరాల్సిందే.. లేదంటే నా జన్మ ధన్యమవదు’ అన్నట్లు వ్యవహరించడమేంటి? అని సోషల్‌ మీడియా వేదికగా చాలామంది ప్రశ్నాస్త్రాలు సంధిస్తున్నారు.

ప్రత్యేక హోదా రావాలి, వెనుకబడిన జిల్లాలకు బుందేల్‌ఖండ్‌ తరహా ప్యాకేజీ దక్కాలి, పోలవరం ప్రాజెక్టు పూర్తవ్వాలి, స్టీల్‌ ప్లాంట్‌ ప్రారంభమవ్వాలి, రాజధాని నిర్మాణం జరగాలి, చాలా కేంద్ర సంస్థలు ఆంధ్రప్రదేశ్‌లో కొలువుదీరాలి.. ఇవన్నీ గడచిన ఐదేళ్ళలో చేయని నరేంద్ర మోడీని, అవేవీ చేయలేదని ఇప్పటిదాకా ఆయన్ని విమర్శించిన వైఎస్‌ జగన్‌.. ఇప్పుడాయన పాదాలకు నమస్కారం చేయాలనుకోవడం హాస్యాస్పదం మాత్రమే కాదు, అభ్యంతరకరం కూడా.