బాబు, పవన్ పై జగన్ షాకింగ్ కామెంట్స్..!

ఆంధ్రప్రదేశ్ లోని ప్రభుత్వ పాఠశాలల్లో ఇంగ్లిష్ మీడియం ప్రవేశపెట్టాలన్న ప్రభుత్వ నిర్ణయాన్ని వ్యతిరేకించిన టీడీపీ అధినేత చంద్రబాబు, జనసేన అధ్యక్షుడు పవన్ కల్యాణ్ లను సీఎం జగన్ గట్టిగా నిలదీశారు. పేదల పిల్లలు ఇంగ్లిష్ మీడియంలో చదవడాన్ని వ్యతిరేకిస్తున్న ఈ పెద్దవాళ్ల పిల్లలు ఏ మీడియంలో చదువుతున్నారని సీఎం వైఎస్ జగన్ మోహన్ రెడ్డి సూటిగా ప్రశ్నించారు. పేదల పిల్లలకు ఇంగ్లిష్ మీడియం వద్దా అని నిలదీశారు.

ప్రపంచంతో పోటీపడే స్థాయికి మన పిల్లలు ఎదగాలని, అది ఒక్క ఇంగ్లిష్ మీడియం పాఠశాలలతోనే సాధ్యం అవుతుందని స్పష్టంచేశారు. దేశ తొలి విద్యాశాఖ మంత్రి మౌలానా అబుల్ కలాం ఆజాద్ జయంతి వేడుకలు విజయవాడలో సోమవారం ఘనంగా నిర్వహించారు. ఈ సందర్భంగా జగన్ మాట్లాడుతూ.. ఇంగ్లిష్ మీడియంపై వస్తున్న విమర్శలకు ఘాటుగా సమాధానమిచ్చారు.

‘‘మన పిల్లలను ఇంగ్లిష్ మీడియం స్కూళ్లలో చదివించాలని భావిస్తే అందరూ విమర్శలు చేస్తున్నారు. ఇందుకు సంబంధించి గత వారం జీవో ఇవ్వగానే కొన్ని స్వరాలు వినిపించాయి. పేదలకు ఇంగ్లిష్ మీడియం ఎందుకు అంటూ స్వరాలు వినిపించాయి. మన పిల్లలు ఇంగ్లిష్ మీడియంలో చదివితే వారి భవిష్యత్తు బాగుంటుందని ఈ నిర్ణయం తీసుకుంటే దీనిపై కొందరు పెద్దవాళ్లు విమర్శలు చేస్తున్నారు. అలాంటివారి పిల్లలు, మనవలు ఏ మీడియంలో చదివారో చెప్పాలి. అయ్యా చంద్రబాబు గారూ మీ కొడుకు చదివింది ఏ మీడియం? మీ మనవడు చదవబోతోంది ఏ మీడియం అని అడుగుతున్నా. ఉప రాష్ట్రపతి వెంకయ్యనాయుడుగారూ.. మీ కొడుకు చదివింది ఏ మీడియం? మీ మనవలు ఏ మీడియంలో చదువుతున్నారో చెప్పాలి. అయ్యా పవన్ కల్యాణ్ గారూ.. మీక్కూడా ఇద్దరు భార్యలు.. బహుశా నలుగురో, ఐదు మందో పిల్లలు. వారిని ఏ మీడియంలో చదివిపిస్తున్నారని అడగుతున్నా’’ అని వ్యాఖ్యలు చేశారు.

మన పిల్లలను ఇంగ్లిష్ మీడియంలో చదివించకపోతే నష్టపోయేది మనమేనని జగన్ స్పష్టంచేశారు. కాగా, చంద్రబాబు, పవన్ పై జగన్ విమర్శల గురించి పక్కన పెడితే.. ఉప రాష్ట్రపతి వెంకయ్య నాయుడిని కూడా టార్గెట్ చేసుకోవడం చర్చనీయాంశమైంది. బీజేపీతో సంబంధాలు క్షీణిస్తున్న తరుణంలో వెంకయ్య లక్ష్యంగా జగన్ చేసిన వ్యాఖ్యలు ఆ రెండు పార్టీల మధ్య మరింత దూరం పెంచే అవకాశం ఉందనే అభిప్రాయాలు వ్యక్తమవుతున్నాయి.