వైఎస్సార్‌ కంటి వెలుగు: ప్రజల కోసమా? పబ్లిసిటీ కోసమా.?

నివారించగల కంటి సమస్యల్ని దాదాపుగా తగ్గించడమే లక్ష్యంగా ఈ పథకాన్ని అమల్లోకి తెస్తున్నట్లు వైసీపీ ప్రభుత్వం చెబుతోంది. ప్రజల ఆరోగ్యానికి సంబంధించి ప్రభుత్వం ఏ పథకం అమల్లోకి తీసుకొచ్చినా దాన్ని అభినందించి తీరాల్సిందే. కానీ, అది పబ్లిసిటీ స్టంట్‌ కోసమే అయితే మాత్రం ఖచ్చితంగా ప్రశ్నించి తీరాల్సిందే.

తెలంగాణలోనూ ముఖ్యమంత్రి కేసీఆర్‌ ఇదే తరహా పథకాన్ని అమల్లోకి తెచ్చారు. దాన్ని ఎన్నికల ప్రచారానికి వాడుకున్నారు. ఆ పథకం వల్ల ఎంతమంది లబ్ది పొందారు.? అన్నది మిలియన్‌ డాలర్ల ప్రశ్న. పథకం అమల్లోకి రాకముందే, ప్రకటనలు గుప్పించేసి.. కేసీఆర్‌ సర్కార్‌ చాలా విమర్శల్ని ఎదుర్కొంది.

ఆంధ్రప్రదేశ్‌లోనూ వైఎస్‌ జగన్‌ ప్రభుత్వం అదే తప్పిదానికి పాల్పడుతోంది. అప్పుడే పథకం అమల్లోకి వచ్చినట్లు ప్రకటనలు కన్పిస్తున్నాయి. వివిధ దశల్లో కంటి పరీక్షలు నిర్వహించాల్సి వుంది. దానికి చాలా సమయం పడుతుంది కూడా. నిజానికి నవరత్నాల్లో 80 శాతం అమలు చేసేశామని వైఎస్‌ జగన్‌ ప్రభుత్వం పబ్లిసిటీ చేసుకుంటున్నా.. అందులో అమల్లోకి వచ్చినవాటి శాతమెంత.? అని లెక్క తీస్తే.. ప్రభుత్వం చెప్పే లెక్కలతో పొంతనే వుండదు.

ఆంధ్రప్రదేశ్‌లో ఆరోగ్యశ్రీ పరిమితులు బాగా పెంచేశారు. ఈ నేపథ్యంలో ప్రభుత్వాసుపత్రులకు వెళ్ళి కంటి పరీక్షలు చేయించుకునేలా కార్యాచరణ రూపొందిస్తే.. అదనపు ఖర్చు తగ్గుతుంది ప్రభుత్వానికి. అది మానేసి.. ప్రతి ఇంటికీ వెళ్ళి కంటి పరీక్షలు చేయించడమంటే.. గ్రామ వాలంటీర్లను సమర్థవంతంగా వాడుకోవడం.. పార్టీకి పేరొచ్చేలా పబ్లిసిటీ చేసుకోవడం తప్ప.. దీని వల్ల ప్రజలకు ఒరిగేది పెద్దగా వుండదన్నది సర్వత్రా వ్యక్తమవుతున్న అభిప్రాయం.

ఈ తరహా పబ్లిసిటీ స్టంట్లు చేయడంలో చంద్రబాబుకి సాటి ఇంకెవరూ వుండరు. బహుశా చంద్రబాబు రికార్డుల్ని కొల్లగొట్టేందుకు వైఎస్‌ జగన్‌ తహతహలాడుతున్నారేమో.! అదే గనుక నిజమైతే, 2019 ఎన్నికల్లో చంద్రబాబు పార్టీకి వచ్చిన ఫలితాలతో కూడా వైఎస్‌ జగన్‌ పార్టీ పోటీ పడాల్సి వస్తుంది 2024 ఎన్నికల నాటికి.