జగన్‌ ఎఫెక్ట్‌: వెలుగు కోల్పోతున్న ఆంధ్ర’జ్యోతి’

తెలుగు మీడియాకి సంబంధించి, వైఎస్‌ జగన్‌ మోహన్‌రెడ్డిని ‘శత్రువు’ అనే స్థాయిలో చూసిన ఘనత ఆంధ్రజ్యోతి అధినేత వేమూరి రాధాకృష్ణకే చెల్లుతుందని చాలా మంది అంటుంటారు. అందులో కొంత వాస్తవం లేకపోలేదు కూడా. టీడీపీ ప్రత్యర్ధులైతే తమకూ ప్రత్యర్ధులే అన్నట్లుగా రాధాకృష్ణకు చెందిన మీడియా సంస్థలు వ్యవహరిస్తుంటాయి.

తెలంగాణాలో టీఆర్‌ఎస్‌కి వ్యతిరేకంగా, నిలబడే ప్రయత్నం చేసి, రాధాకృష్ణ చేతులు కాల్చుకున్న విషయం తెలిసిందే. ఏబీఎన్‌ ఛానెల్‌, ఆంధ్రజ్యోతి పత్రిక టీఆర్‌ఎస్‌ దృష్టిలో ఏంటీ తెలంగాణా ముద్ర వేసుకున్నాయి. అలా అధికార పార్టీ నుండి దాదాపుగా సహాయ నిరాకరణను ఎదుర్కొంటోంది ఆ సంస్థ. ఇప్పుడు తెలంగాణాలోనూ పరిస్థితి దారుణంగా తయారయ్యిందంటూ, మీడియా వర్గాల్లో రాధాకృష్ణ ఆయనకు చెందిన మీడియా సంస్థలకు సంబంధించి చర్చ జరుగుతోంది.

ఆంధ్రప్రదేశ్‌లో వైఎస్సార్‌ కాంగ్రెస్‌ పార్టీ భారీ మెజార్టీతో అధికారం దక్కించుకుంది. దాంతో టీడీపీ శ్రేణులు నైరాస్యంలో పడిపోయాయి. సహజంగానే అధికార పార్టీ నేతలు యాక్టివ్‌గా ఉంటారు. పత్రికల్లో పార్టీకి సంబంధించిన ప్రకటనలు, వ్యక్తిగతంగా ఇమేజ్‌ పెంచుకునే ప్రకటనలు, అధికార పార్టీకి అనుకూలంగా ఉండే పత్రికల్లోనే వేయించుకుంటుంటారు. దాంతో, ఆంధ్రజ్యోతికి అనధికారికంగా సహాయ నిరాకరణ, వైసీపీ నేతల నుండి ఎదురవుతోందని అనుకోవచ్చు. లోకల్‌ ఎడిషన్స్‌లో పార్టీలకు సంబంధించిన ప్రకటనలు తగ్గిపోయేసరికి, కాస్ట్‌ కటింగ్‌ చర్యలకు దిగుతోందట సంస్థ యాజమాన్యం. పరిస్థితుల్ని బట్టి, పేజీల్ని తగ్గించేస్తున్నారట కూడా.

మరోపక్క ప్రభుత్వం తరపున వచ్చే ప్రకటనలు కూడా ప్రయార్టీ బేస్‌ అవుతుండడంతో, అక్కడా దెబ్బ పడిందని అంటున్నారు. దాదాపు పదేళ్లు రాధాకృష్ణ తాలూకు మీడియా సంస్థల నుండి తీవ్రమైన మానసిక క్షోభ అనుభవించిన వైఎస్‌ జగన్‌, ప్రత్యక్షంగా కక్ష సాధింపు చర్యలకు దిగకపోయినా, పరోక్షంగా దిమ్మ తిరిగే షాక్‌ ఇచ్చినట్లవుతోంది. మీడియా వర్గాల్లో జరుగుతున్న ప్రచారమే నిజమైతే, సదరు మీడియా సంస్థలు జిల్లాల్లోని కార్యాలయాల్ని ముందు, ముందు గణనీయంగా తగ్గించేసుకోబోతోందట.