వాళ్లిద్దరి మధ్య నలిగిపోతున్న పవన్‌కళ్యాణ్‌

ఎన్నికల తర్వాత జనసేన పార్టీ పూర్తి స్థబ్దతకి లోనైంది. ఒక్కటంటే ఒక్క రాజకీయ కార్యక్రమం కూడా ప్రజల కోసం జనసేన ఈ మధ్య కాలంలో చేపట్టలేదు. పార్టీలతో అంతర్గతంగా సమీక్షలైతే జరుగుతున్నాయి కానీ, అవి కూడా అర్ధం పర్ధం లేని సమీక్షలేనన్న ప్రచారం గట్టిగా వినిపిస్తోంది. అసలు జనసేన పార్టీలో ఏం జరుగుతోంది.? అమావాస్యకో, పున్నమికో ఓ ప్రెస్‌ నోట్‌ బయటికి వస్తోంది.

అప్పుడప్పుడూ పార్టీ కార్యాలయానికి పవన్‌ వెళ్లినట్లు ఫోటోలు దర్శనమిస్తున్నాయి. ఉన్న ఒకే ఒక్క ఎమ్మెల్యే రాపాక వరప్రసాద్‌ ముఖ్యమంత్రి వైఎస్‌ జగన్‌ భజనలో మునిగి తేలుతున్నారు. ఇలాంటి పరిస్థితుల్లో జనసేనకు వర్కింగ్‌ ప్రెసిడెంట్‌ తప్పనిసరి అన్న ఆలోచన చేస్తున్నారట పార్టీ అధినేత పవన్‌ కళ్యాణ్‌. ఆ పదవిని నాదెండ్ల మనోహర్‌కి ఇచ్చే దిశగా ఇప్పటికే పవన్‌ కళ్యాణ్‌ ఓ నిర్ణయానికి వచ్చినట్లు పార్టీ వర్గాల్లో ప్రచారం జరుగుతోంది.

అయితే, ఆ పదవి సీబీఐ మాజీ జేడీ లక్ష్మీనారాయణకు ఇస్తే, పార్టీకి మేలు జరుగుతుందని, నాదెండ్లకు ఆ పదవి ఇవ్వడం వల్ల ఉపయోగం లేదనీ ఓ వర్గం గట్టిగా వాదిస్తోందట. దాంతో, పార్టీలో అంతర్గత కుమ్ములాటలు తారా స్థాయికి చేరినట్లు సమాచారం. లక్ష్మీ నారాయణ, నాదెండ్ల మనోహర్‌ ఇద్దరూ గత ఎన్నికల్లో ఓడిపోయారు. అయితే, లక్ష్మీనారాయణ మాత్రం గట్టి పోటీ ఇచ్చారు. పైగా, ఆయనకు క్లీన్‌ ఇమేజ్‌ వుంది.

దాంతో, మెజార్టీ లక్ష్మీనారాయణ వైపే మొగ్గు చూపుతున్నారు. కానీ, పార్టీ నడవడానికి, రాజకీయ వ్యూహాలు అవసరం. ఆ వ్యూహాలు రచించడంలో నాదెండ్ల ధిట్ట అని ఆయన మద్దతుదారులు చెబుతున్నారు. అసలే, పార్టీ పరిస్థితి దయనీయంగా ఉంది. ఈ టైంలో ఈ కుమ్ములాటలు పార్టీకి మరింత చేటు తెస్తాయని, తొందరపాటు నిర్ణయాలు వద్దని పవన్‌ కళ్యాణ్‌కి పార్టీ సీనియర్లు సూచిస్తున్నారట. కాగా, లక్ష్మీ నారాయణ పార్టీ కార్యక్రమాలకు కొంత దూరంగా ఉంటున్నారు. నాదెండ్ల మనోహర్‌ కొన్నాళ్లు, దాదాపు అజ్ఞాతంలోకి వెళ్లిపోయినా, మళ్లీ ఇప్పుడు యాక్టివ్‌ అవుతున్నారట.