ఇన్‌సైడ్‌ స్టోరీ: రైతుల్నెందుకు అరెస్ట్‌ చేస్తున్నట్లు.?

వైఎస్సార్సీపీ ఎమ్మెల్యే, ఏపీఐఐసీ ఛైర్మన్‌ రోజా, రాజధాని అమరావతి ప్రాంతంలో రైతుల ఆందోళనలపై సంచలన వ్యాఖ్యలు చేశారు. రైతుల ముసుగులో టీడీపీ నేతలు, కార్యకర్తలే దాడులకు తెగబడ్తున్నారన్నది ఆమె ఆరోపణ. రోజా మాత్రమే కాదు, వైఎస్సార్సీపీకి చెందిన పలువురు ముఖ్య నేతలు ఇవే తరహా ఆరోపణలు చేస్తున్నారు. మంత్రులు సైతం ఇందుకు అతీతమేమీ కాదు.

అసలు ఆందోళనలు చేస్తున్నది రైతులే కాదనీ, వారంతా పెయిడ్‌ ఆర్టిస్టులనీ అధికార వైఎస్సార్సీపీ ఆరోపిస్తోన్న విషయం విదితమే. ప్రభుత్వం తరఫున ఇంత క్లారిటీ వున్నాక, పోలీసులెందుకు అమరావతిలో రైతుల్ని అరెస్ట్‌ చేస్తున్నట్లు.? ఇదే మిలియన్‌ డాలర్ల ప్రశ్న.

ప్రభుత్వం వేరు, రాజకీయ ఆరోపణలు వేరు. మంత్రులు చెప్పే మాటలకీ, పార్టీ నేతలు చెప్పే విషయాలకీ అస్సలేమాత్రం పొంతన వుండదు.. ఇది ఇంకోసార్లి స్పష్టమయిపోయిందంతే. వైసీపీ ముఖ్య నేతలంతా, మీడియా ముందుకొచ్చి, అమరావతిలో జరుగుతున్న ఆందోళనలకు రాజకీయ రంగు పులిమే ప్రయత్నం చేస్తున్నారు.

ఆ రైతుల ఆందోళనను రాజకీయంగా క్యాష్‌ చేసుకోవడానికి తెలుగుదేశం పార్టీ సహజంగానే ప్రయత్నిస్తుంటుంది. ఈ రోజు చాలామంది రాజకీయ ప్రముఖుల్ని పోలీసులు హౌస్‌ అరెస్ట్‌ చేసిన మాట వాస్తవం. అందులో టీడీపీ నేతలే, వామపక్షాలకు చెందిన నేతలు, జనసేన పార్టీ నేతలూ వున్నారు. అయినా, రైతుల ఆందోళనలు ఆగలేదు సరికదా, ఉద్యమం మరింత ఉధృతరూపం దాల్చింది.

వైసీపీ ఎమ్మెల్యేపై దాడి వరకూ వెళ్ళింది పరిస్థితి. పోలీసులు ఎలాగూ అరెస్టుల పర్వానికి మళ్ళీ తెరలేపుతారు. వైసీపీనే అధికారంలో వుంది కదా.. ఆందోళనలు చేస్తున్నది రైతులు కానే కాదని వైసీపీ నేతలే చెబుతున్నారు కదా.. ఆ వైసీపీ ప్రభుత్వమే, రైతుల మీద కేసులు పెట్టకుండా వుండగలదా.? ఛాన్సే లేదు. చంద్రబాబు హయాంలోనూ ఇలాంటివి చాలానే జరిగాయి. వైసీపీ అధికారంలోకి వచ్చాక అలాంటి కేసుల్ని కొట్టిపారేసింది. రేప్పొద్దున్న ప్రభుత్వం మారితే, ఇప్పుడు పెట్టిన కేసుల్ని ఆ తర్వాత కొట్టి పారేయడం మామూలే.