చిరంజీవి అసలు ప్రముఖుడే కాదు.! ఏంటీ ఏడుపు.? సిగ్గుండక్కర్లా.?

మెగాస్టార్ చిరంజీవి ఎలాంటి ప్రముఖుడు.? ఇప్పుడీ చర్చ షురూ అయ్యింది. కాదు కాదు, ఇదొక పెయిడ్ ఏడుపు. చిరంజీవి మీద ఏడవడం తప్ప, వేరే పని కొన్ని మీడియా సంస్థలకి, అందునా బులుగు అలాగే పచ్చ మీడియా సంస్థలకి వుండడంలేదు. ఇది చాలాకాలంగా నడుస్తున్న తంతు.

ప్రజారాజ్యం పార్టీని చిరంజీవి స్థాపించినప్పుడు, దాన్ని చంపేయడానికి నడిచిన పచ్చ కుట్ర, ఆ తర్వాత జనసేన పార్టీని పవన్ కళ్యాణ్ స్థాపిస్తే, దాన్ని చంపేయడానికి పచ్చ మీడియాతోపాటు బులుగు మీడియా పన్నిన, పన్నుతున్న కుట్రల గురించి ఎంత చెప్పుకున్నా తక్కువే.

మెగా కాంపౌండ్ నుంచి ఏదన్నా సినిమా వస్తోందంటే చాలు, ఏడ్చి ఏడ్చి ఛస్తుంటారు కొందరు. చిరంజీవి రాజకీయాల్లో లేకపోయినా, వీలు చిక్కినప్పుడల్లా చిరంజీవి మీద రాజకీయంగా పడి ఏడుస్తూనే వున్నారు. అసలు చిరంజీవి ప్రస్తావన లేకుండా తెలుగునాట, అందునా ఆంధ్రప్రదేశ్ రాజకీయాలు ఎందుకు నడవడంలేదు.?

భీమవరంలో మన్యం వీరుడు అల్లూరి విగ్రహావిష్కరణ.. ఈ కార్యక్రమానికి ప్రధాని నరేంద్ర మోడీ రానున్నారు.. కేంద్ర హోం శాఖ సహాయ మంత్రి కిషన్ రెడ్డి, మాజీ కేంద్ర మంత్రి చిరంజీవికి అల్లూరి విగ్రహావిష్కరణలో పాల్గొనాల్సిందిగా ఆహ్వానాన్ని అందించారు. ఇదీ వార్త. దీని చుట్టూ నానా చెత్త కథనాలూ షురూ అవుతున్నాయ్.

చిరంజీవిని పిలిచారు, పవన్ కళ్యాణ్‌ని మరిచారు.. అన్నది ఓ కథనం. చిరంజీవి ఎలాంటి ప్రముఖుడు.? అన్నది ఇంకో కథనం. తెలుగునాట మెగాస్టార్ చిరంజీవికి వున్న పాపులారిటీ గురించి కొత్తగా చెప్పేదేముంది.? సినీ నటుడిగా తెలుగు ప్రేక్షకుల మదిలో ఆయన చెరగని ముద్ర వేశారు.

చిరంజీవి గతంలో పాలకొల్లు నుంచి అసెంబ్లీకి పోటీ చేశారు, ఓడిపోయారు. తిరుపతి ఎమ్మెల్యేగా గెలిచారు. రాజ్యసభకు ఎంపికయ్యారు, కేంద్ర మంత్రిగానూ పని చేశారు. ఇవి చాలవా చిరంజీవి, భీమవరంలో అల్లూరి విగ్రహావిష్కరణ కార్యక్రమానికి హాజరయ్యేందుకు ఆహ్వానం పొందడం కోసం.?

లేదూ, అక్రమాస్తుల కేసులో ఆరోపణలు ఎదుర్కొని జైలుకు వెళ్ళి వుండాలా.? అలాగైతేనే, బహుశా బులుగు మీడియా, చిరంజీవిని ‘ప్రముఖుడిగా’ గుర్తిస్తుందేమో.! లేదంటే, వెన్నుపోటు రాజకీయాలు చిరంజీవి చేసి వుంటే, ఆయన్ని ప్రముఖుడిగా పచ్చ మీడియా గుర్తిస్తుందేమో.!

చిరంజీవికి ఆహ్వానం అందితే, ఆయన తమ్ముడిగా పవన్ కళ్యాణ్ గర్వపడతారు. అంతేగానీ, పవన్ నొచ్చుకునే పరిస్థితి వుండదు. ఈ మాత్రం ఇంగితం లేనివాళ్ళు మీడియా సంస్థల్ని నడపడం, జర్నలిస్టులుగా గుర్తింపు పొందడం. తెలుగు నాట జర్నలిజం, అత్యంత జుగుప్సాకరమైన స్థాయికి దిగజారిపోయిందనడానికి ఇంతకన్నా నిదర్శనం ఇంకేం కావాలి.?