సెక్స్ చేస్తూ చనిపోతే.. కంపెనీదే బాధ్యత!

ఇదో విచిత్రమైన సంగతి. బిజినెస్ ట్రిప్ పై వెళ్లిన ఓ కంపెనీ ఉద్యోగి, అక్కడ వేరే మహిళతో శృంగారం చేస్తూ గుండెపోటుతో చనిపోయాడు. ఇప్పుడు అతడికి పరిహారం ఎవరు చెల్లించాలి? కంపెనీ ట్రిప్ పై వెళ్లినందుకు కంపెనీ ఇవ్వాలా? సెక్స్ చేస్తూ చనిపోయినందున ఆ మహిళ బాధ్యురాలు అవుతుందా? లేక ఇది అతడి తప్పు కాబట్టి ఎవరికీ బాధ్యత లేదా? ఈ అంశంపై ఏకంగా ఆరేళ్లపాటు కోర్టులో వాద ప్రతివాదనలు సాగాయి.

తాజాగా కోర్టు ఈ కేసులో సంచలన తీర్పు వెలువరించింది. ఫ్రాన్స్ కి చెందిన టీఎస్ఓ అనే రైల్వే కనస్ట్రక్షన్ కంపెనీలో ఎం జేవియర్ అనే వ్యక్తి ఉద్యోగం చేస్తున్నారు. 2013లో కంపెనీ పని నిమిత్తం ఆయన లారియట్ ప్రాంతానికి వెళ్లారు. అక్కడ బస చేసిన సందర్భంలో ఓ అపరిచితురాలైన మహిళతో సెక్స్ లో పాల్గొన్నారు. అయితే, శృంగారం చేస్తుండగా గుండెపోటు రావడంతో ప్రాణాలు కోల్పోయాడు. అయితే, అతడికి టీఎస్ఓ ఎలాంటి పరిహారం చెల్లించలేదు. దీంతో అతడి కుటుంబం కోర్టుకెళ్లింది. జేవియర్ మరణం కంపెనీ పని మీద ఉన్నప్పుడు జరిగినందున కంపెనీయే పరిహారం చెల్లించాలని వాదించింది.

Also Read: అతి స్పందన.. ‘కోరిక’ ముదిరి.. ఆసుపత్రిలో చేరి..

అయితే, టీఎస్ఓ మాత్రం ఈ వాదనతో విభేదించింది. అతడు తన వ్యక్తిగత వాంఛ తీర్చుకోవడం కోసం శృంగారంలో పాల్గొన్నాడని, అందుకు కంపెనీ బాధ్యత వహించదని స్పష్టంచేసింది. పైగా అతడికి తాము కేటాయించిన హోటల్ లో కాకుండా వేరే హోటల్ లో ఈ సంఘటన చోటు చేసుకుందని, అందువల్ల తమకు ఎలాంటి సంబంధ లేదని పేర్కొంది. అంతేకాకుండా అతడు చేసిన పని వల్ల పర్యటన ఉద్దేశం కూడా ప్రభావితమైందని వాదించింది.

తాజాగా ఈ కేసులో న్యాయమూర్తి తన తీర్పు వెలువరించారు. అది ముమ్మాటికీ పని ప్రదేశంలో జరిగిన ప్రమాదంగానే అభివర్ణించారు. ‘‘శృంగారం కూడా రోజువారీ కార్యకలాపాల్లోకే వస్తుంది. ప్రతి రోజూ స్నానం చేయడం, భోజనం చేయడం వంటి కార్యకలాపాల కిందకే సెక్స్ కూడా వస్తుంది. దీని వల్ల అతడి ఉద్యోగ బాధ్యతలపై ఎలాంటి ప్రభావం పడదు’’ అని పేర్కొన్నారు. ఈ నేపథ్యంలో కంపెనీ అతడికి పరిహారం చెల్లించాల్సిందేనని స్పష్టంచేశారు.