పదవుల కోసం అంతగా కొట్టుకోవాలా..? ‘మా’ పరిణామాలపై చిరంజీవి వ్యాఖ్యలు

గతంలో ఎన్నడూ లేని విధంగా మా ఎన్నికల సందర్భంగా జరిగిన పరిణామాలు తీవ్ర చర్చనీయాంశం అయ్యాయి. దీనిపై పెళ్లిసందడి సినిమా వేడకలో ముఖ్య అతిధిగా హాజరైన చిరంజీవి మాట్లాడుతూ..

‘నారప్ప’ సినిమా చూసి వెంకటేశ్‌ని అభినందించాను. ‘సైరా’ బాగా నచ్చి, నన్ను మెచ్చుకున్నాడు. అందరి హీరోల మధ్య ఇలాంటి ఆహ్లాదకరమైన వాతావరణం ఉంటే పరిశ్రమలో వివాదాలు, కొట్టుకోవడం, ఒకరినొకరు మాటలు అనడం, అనిపించుకోవడం ఉండదు కదా. పదవులు తాత్కాలికం. అవి రెండేళ్లుంటాయా? మూడేళ్లుంటాయా? నాలుగేళ్లుంటాయా? అనేది వేరే విషయం. పదవులు అనేవి చిన్న చిన్న బాధ్యతల్లాంటివి. వాటి కోసం మనం మాటలు అనడం, అనిపించుకోవడం చూస్తుంటే బయటవారికి ఎంత లోకువ అయిపోతాం? పదవి కోసం అంత లోకువ అవ్వాలా? అది నాకు బాధగా ఉంది.

నేను ఏ ఒక్కరినీ వేలు పెట్టి చూపించడం లేదు. మన ఆధిపత్యం చూపించుకునేందుకు ఎదుటవారిని కించపరచాల్సిన అవసరం లేదు.  ఇది ఎక్కడ ప్రారంభమైందో గుర్తుంచుకోండి. ఎవరి కారణంగా ఈ వివాదాలు మొదలయ్యాయో ఆలోచించండి. అలాంటి వ్యక్తిని దూరంగా ఉంచితేనే వసుధైక కుటుంబం అవుతుంది’ అని అన్నారు.