అప్పట్లో చంద్రన్న కానుక.. ఇప్పుడేమో జగనన్న దీవెన.! జగనన్న గోరుముద్ద.. జగనన్న చిక్కీ.. జగనన్న అదీ.. జగనన్న ఇదీ.. ఇప్పుడేమో కొత్తగా జగన్ మామ పేరుతో హంగామా.! అసలు ఆంధ్రప్రదేశ్ రాష్ట్రం ఎక్కడికి పోతోంది.? ఎందుకీ వ్యక్తి పూజ.!
మామూలుగా ఎవరన్నా సాయం చేస్తే, వారి పేరుని ‘లబ్ది పొందినవాళ్ళు’ గుర్తు చేసుకుంటారు. ఇక్కడ, సంక్షేమ పథకాలు అమలయ్యేది ప్రజాధనంతో. వైఎస్ జగన్ మోహన్ రెడ్డి కేవలం ముఖ్యమంత్రి హోదాలో బటన్ మాత్రమే నొక్కుతారు. దానికి బోల్డంత సొంత పబ్లిసిటీ కూడా చేసుకుంటారు.
అప్పులు జరిగేది రాష్ట్రం పేరు మీద.. ఆ అప్పు భారం రాష్ట్ర ప్రజల నెత్తిన పడుతుంది. పుట్టే ప్రతి బిడ్డ మీదా ఆ అప్పు చెల్లించాల్సిన బాధ్యత వుంటుంది. అలాంటప్పుడు, సంక్షేమ పథకాలకి చంద్రన్న పేరు.. జగనన్న పేరు ఎందుకు.? ఇదేమీ మిలియన్ డాలర్ల ప్రశ్న కాదు.
కొత్తగా ఈ జగన్ మామ కాన్సెప్ట్ ఏంటబ్బా.? అంటే, అదంతే. ఇంతకీ జగన్ మామ తన జేబుల్లోంచి డబ్బులు తీసి, రాష్ట్రంలోని పిల్లల సంక్షేమం కోసం ఏమైనా ఖర్చు చేస్తున్నారా.? లేదే. పైగా, ప్రభుత్వ ప్రకటనల్ని భేషుగ్గా తన సొంత పత్రికకు ఇచ్చుకుంటున్నారాయె.
సలహాదారులకు లక్షల్లో వేతనాలు తెలిసిన విషయమే. లెక్కకు మిక్కిలిగా వున్న సలహాదారులకు మొత్తంగా ఏటా కోట్లాది రూపాయలు వెచ్చించక తప్పనిసరి. పబ్లిసిటీ ప్రకటనలు.. ఈ సలహాదారుల వేతనాలు.. వీటికి తోడు కుప్పలు తెప్పలుగా ఏర్పాటు చేసిన కార్పొరేషన్లలో నియమించిన నామినేటెడ్ పోస్టులు.. వాటి వేతనాలు.. లెక్కేసుకుంటూ పోతే తడిసి మోపెడైపోతుంది.
అప్పట్లో చంద్రన్న అయినా, ఇప్పుడు జగనన్న లేదా జగన్ మామ అయినా.. జనం నెత్తిన తమ సొంత పబ్లిసిటీ కోసం అప్పుల భారం మోపుతున్నారన్నమాట. మామూలుగా అయితే అన్నగానీ, మామగానీ సాయం చేయాలి. వీళ్ళేంటో.. బంధుత్వం పేరు చెప్పి.. జనం నెత్తిన బండ మోపుతున్నారు. అది జనానికి ఎప్పుడు అర్థమయ్యేనో ఏమో.!