సోషల్ మీడియాపై ఉక్కుపాదం మోపుతోన్న కేంద్రం.. ఏది నిజం.?

సోషల్ మీడియాపై కేంద్రం ఉక్కుపాదం మోపుతోందన్న చర్చ దేశవ్యాప్తంగా జరుగుతోంది. ప్రభుత్వ వ్యతిరేక ప్రచారం సోషల్ మీడియా వేదికగా జరిగితే అది రాష్ట్ర ప్రభుత్వమైనా, కేంద్ర ప్రభుత్వమైనా సహించలేవు. అదంతే. గతంలోనూ ఇదే జరిగింది.. ఇప్పుడూ అదే జరుగుతోంది. మామూలు కామెంట్లపైనా పోలీసులు ఉక్కుపాదం మోపుతూ నెటిజన్లను అరెస్టు చేస్తున్న సందర్భాలు కోకొల్లలు. ఇవేవీ పెద్దగా లెక్కల్లోకి రావడంలేదు.

రాత్రికి రాత్రి నెటిజన్లను అరెస్టు చేసి, వీలైతే బెదిరించేసి.. కుదిరితే కుళ్ళబొడిచేసి వదిలేస్తున్న సందర్భాలూ వున్నాయంటూ మీడియాలోనూ కథనాలు దర్శనమిస్తున్నాయి. ఇక, ఇప్పుడు ఈ వ్యవహారం కోర్టుకి చేరింది. కొత్త ఐటీ నిబంధనలను వాట్సాప్, కోర్టులో సవాల్ చేసింది. వినియోగదారుల ప్రైవసీ దెబ్బతింటుందనీ, ప్రజల ప్రాథమిక హక్కులకు భంగం కలుగుతుందనీ వాట్సాప్ వాపోతోంది. అరరె, ఎంత బాధ్యత వినియోగదారులంటే.! వాట్సాప్ కావొచ్చు.. ఇంకోటి కావొచ్చు.. సమాచారం వేగంగా ఇచ్చిపుచ్చుకోవడంలో వినియోగదారులకు ఎంతగానో ఉపయోగపడుతున్నాయి.

అదే సమయంలో, వీటి ద్వారా వ్యక్తిగత గోప్యతకు ముప్పు వాటిల్లుతున్నమాట వాస్తవం. మార్ఫింగ్ ఫొటోలు, వీడియోలు.. ఇంతేనా, పర్సనల్ వీడియోలు లీకవడం.. ఇదంతా పెద్ద కథ. తీవ్రమైన నేరాలకు సంబంధించిన స్కెచ్‌లు కూడా వాట్సాప్ సహా ఇతర సామాజిక మాధ్యమాల ద్వారా జరుగుతున్నాయన్నది నిర్వివాదాంశం. ప్రభుత్వాలకు వ్యతిరేకంగా కుట్రల సంగతి సరే సరి. దేశానికి వ్యతిరేకంగా జరిగే కుట్రలు, విధ్వంసాలకు ప్లానింగ్స్.. ఇలాంటివాటిపై సమాచార బదిలీకి సంబంధించి ’మూలాల్ని’ తెలుసుకుని, దోషుల్ని పట్టుకోవడానికి వీలుగానే కొత్త ఐటీ నిబంధన తెచ్చామని కేంద్రం అంటోంది.

అదే నిజమైతే, ఇక్కడ కేంద్రాన్ని తప్పు పట్టడానికి వీల్లేదు. నాణానికి రెండు వైపులుంటాయి.. చెప్పేదొకటి, చేసేది ఇంకొకటి. వాట్సాప్ కావొచ్చు, ఇంకో సామాజిక మాధ్యం కావొచ్చు.. ఏదైనాసరే.. అందులో సమాచారం మరీ సీక్రెట్ ఏమీ కాదు. విచారణ సంస్థలు సంబంధిత సమాచారాన్ని కోరినప్పుడు, ఆయా సంస్థలు అందించి తీరాల్సిందే. ఇచ్చేది లేదని ఆయా సంస్థలు చెబుతున్నాయంటే, ఖచ్చితంగా అనుమానించాల్సిందే.