గుడివాడలో సంక్రాంతి స్పెషల్ డెన్: దోపిడీ అన్-లిమిటెడ్.!

ఉభయ గోదావరి జిల్లాల్లో సంక్రాంతి పండగ అంటే కోడి పందాల హంగామా మాత్రమేనా.? అంటే, అలా ప్రొజెక్ట్ అయిపోయింది మరి. వందల కోట్ల ‘యాపారం’ ఈసారి కూడా జరిగింది. కోవిడ్ భయాల్ని పక్కన పెట్టి, రికార్డు స్థాయిలో జనం పందెం గిరుల వద్ద కనిపించారు.. కనీ వినీ ఎరుగని రీతిలో సొమ్ములు చేతులు మారాయి.

కృష్ణా అలాగే గుంటూరు జిల్లాల్లోనూ ఉభయ గోదావరి జిల్లాల స్థాయిలోనే ‘గ్యాంబ్లింగ్’ జరిగింది. కోడి పందాలు, గుండాట, పేకాట శిబిరాలు.. అబ్బో, ఆ కొక్కే వేరప్పా. ఇవన్నీ ఓ యెత్తు, కృష్ణా జిల్లా గుడివాడలో వేసిన కాసినో డెన్ ఇంకో యెత్తు.

పైకి సాధారణ టెంట్ అయినా, లోపల సకల సౌకర్యాల్నీ ఏర్పాటు చేశారు నిర్వాహకులు. ఒక్కసారి ఈ టెంట్‌లోకి అడుగు పెడితే, ఆ ప్రపంచం మరో స్థాయిలో కనిపిస్తుందట. అచ్చం విదేశాల్లో వున్నట్టో లేదంటే గోవా కాసినోలో వున్నట్టో అనుభూతి కలుగుతుందట. ‘అట’ ఏమిటి.? దానికి సంబంధించిన వీడియోలు బయటకు వచ్చేస్తేనూ.!

లోపలికి వెళ్ళినవాళ్ళలో చాలామంది జేబులు గుల్ల చేసుకుని బయటకు వచ్చారట. లక్షలు కాదు, కోట్లు చేతులు మారాయట ఈ హై టెక్నాలజీ టెంట్ల కింద. ఇంతకీ, వీటిని నిర్వహించిందెవరు.? ఆ ఒక్కటీ అడక్కూడదంతే. కానీ, సోషల్ మీడియాలోనూ మెయిన్ స్ట్రీమ్ మీడియాలోనూ మాత్రం మంత్రి కొడాలి నాని పేరు ప్రముఖంగా వినిపిస్తోంది.

ఇది కనీ వినీ ఎరుగని వ్యవహారమేమీ కాదనీ, గతంలోనూ జరిగిందనీ.. అయితే, ఈసారి గతంలో కంటే కాస్త భిన్నంగా, చాలా హై ఫై తరహాలో నిర్వహించారనీ అంటున్నారు. ‘అబ్బే, మాకేంటి సంబంధం.?’ అంటూ అధికార పార్టీ నేతలు తమపై వస్తున్న ఆరోపణల్ని కొట్టి పారేస్తున్నా, తెరవెనుక మాత్రం అదికార పార్టీ ఈ కాసినోల నిర్వహణతో కోట్లు వెనకేసుకుందన్న గుసగులైతే ఆగడంలేదు.

ఆంధ్రప్రదేశ్ ఈ విషయంలో మాత్రం బాగా అభివృద్ధి చెందినట్టుంది. కాసినోలు మాత్రమే కాదు, కాసనోవాలు కూడా ఆంధ్రప్రదేశ్‌లో ఈ సంక్రాంతికి పండగ చేసుకున్నట్టు వినికిడి.