బుగ్గన ‘అప్పుల’ సూక్తులు: భారం మోసేది ఎవరు చెప్మా.?

‘అప్పులు చేస్తే, ఇబ్బందులుంటాయ్.. తప్పవు. అప్పులంటేనే అంత. కానీ, తప్పనిసరి పరిస్థితుల్లో అప్పులు చేస్తున్నాం. మాది సంక్షేమ పాలన. సంక్షేమం కోసం ఖర్చు చేస్తున్నాం. జనంలోకి డబ్బుల్ని తీసుకెళ్తున్నాం.. ఆర్థిక వ్యవస్థలోకి డబ్బులు వెళితేనే.. ఫైనాన్షియల్ స్టేటస్ బావుంటుంది..’ అంటూ ఆంధ్రపదేశ్ ఆర్థిక మంత్రి బుగ్గన రాజేంద్రనాథ్, రాష్ట్రం అప్పుల్లో కూరుకుపోవడానికి సంబంధించి వెల్లువెత్తిన విమర్శలపై వివరణ ఇచ్చారు. అంతా బాగానే వుందిగానీ.. ఈ అప్పులు తీర్చాల్సిందెవరు.? వైసీపీ పార్టీనా.? రాష్ట్ర ప్రజలా.? అన్నదే ఇక్కడ మిలియన్ డాలర్ల ప్రశ్న.

‘మాది సంక్షేమ పాలన’ అని చెప్పుకుంటున్నప్పుడు అప్పులు తీర్చాల్సింది కూడా మీరే కదా.. ఎందుకంటే, మీ పబ్లిసిటీ కోసం కూడా అదనపు ఖర్చులు జరుగుతున్నాయి కదా.. అని నెటిజన్లు సోషల్ మీడియా వేదికగా ప్రశ్నిస్తున్నారు. సరే, నెటిజన్ల ప్రశ్నలకు సమాధానం ప్రభుత్వాల నుంచి రాదనుకోండి.. అది వేరే విషయం. ఎవరు ఔనన్నా ఎవరు కాదన్నా.. కరోనా ప్రపంచ ఆర్థిక స్థితిగతుల్ని దెబ్బ తీసింది. ఏ దేశం, ఏ రాష్ట్రం ఇందుకు మినహాయింపు కాదు.

అయితే, కొందరు వ్యక్తులు మాత్రం కరోనా సమయంలో కూడా ఆర్థికంగా పుంజుకున్నారు. అందుకు ఇటీవల వెల్లడైన బిలియనీర్ల లిస్ట్ నిదర్శనం. కొన్ని కంపెనీలు గడచిన ఏడాది కాలంలో అనూహ్యంగా లాభాలు సొంతం చేసుకున్నాయి. ఇవన్నీ ప్రభుత్వాల ‘దయ’తో జరిగినవేననే చర్చ జన బాహుళ్యంలో జరుగుతోంది. రాష్ట్రం అప్పుల పాలైపోతోందంటే.. ప్రతి పౌరుడి మీద ఆ భారం ఖచ్చితంగా పడుతుంది.

పొరుగు రాష్ట్రాలతో పోల్చితే, పెట్రోలు.. మద్యం ధరలు ఆంధ్రపదేశ్‌లో ఎక్కువే. పన్నులు పెంచుతున్నా, రాష్ట్రం ఎందుకు అదనంగా అప్పులు చేయాల్సి వస్తోంది.? అన్న ప్రశ్నకు ప్రభుత్వ పెద్దలు సరైన సమాధానం చెప్పలేకపోతున్నారు. ‘గతంలో చంద్రబాబు ప్రభుత్వం అడ్డగోలుగా అప్పులు చేసింది..’ అని స్వయానా బుగ్గన చెబుతున్నారు. అదే బుగ్గన, ‘అప్పులు చేశాం.. గర్వంగా చెప్పుకుంటున్నాం..’ అంటున్నారు. ఇదెక్కడి నీతి.?

‘చంద్రబాబు హయాంలో రాష్ట్రం అప్పుల కుప్పలా తయారైంది’ అని వైసీపీ గతంలో చెప్పింది. మరి, ఇప్పుడు అంతకన్నా ఎక్కువ అప్పులు జరుగుతున్నాయి కదా.? రాష్ట్ర భవిష్యత్తు నాశనపోతోంది కదా.. అనంటే, సమాధానం వుండదుగాక వుండదు.