అక్కడికేదో అత్తా కోడళ్ళ పంచాయితీలా తయారయ్యింది బిగ్ బాస్ తెలుగు రియాల్టీ షో ఏడో సీజన్ వీకెండ్ ఎలిమినేషన్కి సంబంధించిన నామినేషన్ల వ్యవహారం.! సోమవారం అంటేనే నామినేషన్ల పర్వం. దాంతో, పాయింట్ వున్నా లేకున్నా పెంట పెంట చేసెయ్యడమే కంటెస్టెంట్ల పని.
అసలు ఎందుకు నామినేషన్ చేస్తున్నాం.. అన్న విషయమై కనీసపాటి సోయ కూడా కంటెస్టెంట్లకు వుండటంలేదు. తాజా నామినేషన్ల ఎపిసోడ్లో రతిక వర్సెస్ శోభా శెట్టి, రతిక వర్సెస్ ప్రియాంక.. ఘాటైన వాగ్యుద్ధమే జరిగింది. రీ-ఎంట్రీ తర్వాత బాగా డల్ అయిపోయిన రతిక, ఫుల్ జోష్లో కనిపించింది. మరీ ముఖ్యంగా ఆమె యాక్టింగ్ స్కిల్స్ వేరే లెవల్ అనుకోవచ్చు నామినేషన్ల సమయంలో.
ఇంకోపక్క, శోభా శెట్టి కాస్త కామ్గా వ్యవహరించిందిగానీ, ప్రియాంక మాత్రం చెలరేగిపోయింది. రతిక – ప్రియాంక.. ఇద్దరూ పోటా పోటీగా యాక్టింగ్ చేసేశారు. పైగా, అది ఓవర్ యాక్టింగ్ అయి కూర్చుంది. అంతకు ముందు, నామినేషన్ కోసం తన వద్ద ఒక్కరి గురించిన పాయింట్స్ మాత్రమే వున్నాయని చెప్పిన రతిక, ‘ల్యాగ్ వద్దు’ అని బిగ్ బాస్ వార్నింగ్ ఇవ్వడంతో, ఇద్దర్నీ చకచకా నామినేట్ చేసేసింది. కాగా, ‘టాక్సిక్’ అనే మాటని ప్రియాంక వాడితే, ‘షిట్’ అంటూ రతిక నోరు జారింది.
రతిక తర్వాత తన నామినేషన్స్ ప్రస్తావించాడు అర్జున్. అర్జున్ లిస్టులో తొలుత పేరు పల్లవి ప్రశాంత్ కాగా, రెండో పేరు శోభా శెట్టి. షరామామూలుగానే పల్లవి ప్రశాంత్ అతి చేశాడు. నామినేషన్లనగానే చెలరేగిపోయే పల్లవి ప్రశాంత్ ఇప్పుడూ అదే చేశాడు. ప్రశాంత్కి ధీటుగా అర్జున్ కూడా చెలరేగిపోయాడు.
అర్జున్ తన రెండో నామినేషన్ని శోభా శెట్టికి వేశాడు. ఈ క్రమంలో ‘తింగరి సమాధానం.. తింగరి ప్రశ్న’ అంటూ శోభా శెట్టి – అర్జున్.. ఇద్దరూ ‘తింగరితనం’ ప్రదర్శించారు. ఇదిలా వుంటే, ఎపిసోడ్లో అశ్విని షరామామూలుగానే ఛండాలమైన ఏడుపు షురూ చేసింది.
రతికను ప్రియాంక నామినేట్ చేసే క్రమంలో ‘డామినేషన్’ అనే పదం చుట్టూ పెద్ద రచ్చ జరిగింది. రతికతోపాటు అశ్వినిని కూడా నామినేట్ చేసింది ప్రియాంక. గత వారమంతా ‘రూడ్ బిహేవియర్’ ప్రదర్శించావంటూ అశ్విని మీద ప్రియాంక విరుచుకుపడింది.