పాపం.. ఎంత చేసినా నెగిటివేనా?

ఏపీలో అధికార వైఎస్సార్ సీపీకి కాలం అస్సలు కలిసి రావడంలేదనిపిస్తోంది. ఎంత చేసినా, ఏం చేసినా సానుకూలత కంటే ప్రతికూలతే ఎక్కువ ప్రతిబింబిస్తోంది. అనాలోచిత నిర్ణయాల వల్లో లేక రాజకీయాలు సరిగా చేయలేకపోవడం వల్లో అన్నింటా నెగిటివ్ ఫలితాలే చూడాల్సి వస్తోంది. ఎన్నో హామీలిచ్చి అధికారంలోకి వచ్చిన జగన్.. ఆ హామీల అమలులో చిత్తశుద్ధితోనే వ్యవహరిస్తున్నారు. ఈ విషయంలో చంద్రబాబుతో పోలిస్తే జగన్ ఎన్నో రెట్లు మెరుగు అనడంలో ఎలాంటి సందేహం లేదు.

రైతు రుణమాఫీ, డ్వాక్రా మహిళల రుణాలు, నిరుద్యోగ భృతి వంటి విషయాల్లో చంద్రబాబు ఎన్ని పిల్లమొగ్గలు వేశారో ఏపీ ప్రజలకు తెలుసు. ఆ ఫలితమే మొన్నటి ఎన్నికల్లో జగన్ కు భారీ మెజార్టీ దక్కడానికి కారణమైంది. దీంతో అధికారంలోకి వచ్చిన తర్వాత జగన్.. తన హామీల అమలుపై దృష్టిపెట్టారు. ఒక్కొక్కటిగా అమలు చేసుకుంటూ వస్తున్నారు. నిజానికి ఇదే పని చంద్రబాబు చేసి ఉంటే, ఆయన అనుకూల మీడియాలో ఇవన్నీ పెద్ద ఎత్తున హోరెత్తిపోయేవి. కానీ జగన్ కు ఆ మీడియా మొత్తం వ్యతిరేకం కావడంతో వీటిని పట్టించుకోవడంలేదు.

చేసింది చెప్పుకోవడంలోను.. ప్రతిపక్షాలు, వ్యతిరేక మీడియాలో వచ్చే కథనాలను ధీటుగా తిప్పికొట్టడంలోనూ అధికార పార్టీ విఫలమవుతోందనే అభిప్రాయాలు వ్యక్తమవుతున్నాయి. తమకు మీడియా సపోర్ట్ లేకపోవడమే ఇందుకు ప్రధాన కారణమని వైసీపీ నేతలు పేర్కొంటున్నారు. నిజానికి కరోనా విషయంలో ఏపీ భేషుగ్గా పనిచేస్తోందని సాక్షాత్తు కేంద్ర ఆరోగ్య శాఖ ప్రశంసించింది. కరోనా కట్టడిలో ఏపీ కృషి బాగుందని ఓ జాతీయ ఛానల్ సైతం కొనియాడింది. కానీ ప్రధాన మీడియా వైసీపీకి వ్యతిరేకంగా ఉండటం వల్ల ఇలాంటి విషయాలు మరుగున పడిపోతున్నాయి.

‘‘ఏపీ, తెలంగాణల్లో భిన్న పరిస్థితులు నెలకొన్నాయి. అక్కడి మీడియా కేసీఆర్ కు మద్దతుగా నిలవక తప్పని పరిస్థితులున్నాయి. కానీ ఏపీలో అలా లేదు. మేం ఎంత చేస్తున్నా.. అసలు విషయాన్ని పక్కన పెట్టేసి, వ్యతిరేక కథనాలకే ఇక్కడి మీడియా ప్రాధాన్యత ఇస్తోంది. తెలంగాణలో కలెక్టర్లు విడుదల చేస్తున్న కరోనా లెక్కలకు, ప్రజారోగ్య విభాగం వెల్లడించే లెక్కలకు మధ్య తేడాలుంటున్నాయి. కానీ ఈ విషయాన్ని అక్కడి మీడియా పట్టించుకోదు. ఏపీలో మాత్రం అన్ని వివరాలతో ఎప్పటికప్పుడు లెక్కలు విడుదల చేస్తున్నా.. కేసులు దాచేస్తున్నారంటూ తప్పుడు ప్రచారం చేస్తున్నారు’’ అని వైసీపీకి చెందిన పలువురు నేతలు విమర్శిస్తున్నారు.

మరోవైపు చాలా విషయాల్లో కోర్టుల్లో ప్రతికూల తీర్పులు రావడం కూడా వైసీపీకి ఇబ్బందిగా పరిణమించింది. ఆయా అంశాల్లో కాస్త తెలివిగా ఆలోచించి నిర్ణయం తీసుకుని ఉంటే ఈ పరిస్థితి ఉండేది కాదని అంటున్నారు. ఇంగ్లిష్ మీడియం అంశాన్నే తీసుకుంటే.. రాష్ట్రంలో ఎక్కువ మంది తల్లిదండ్రులు ఆంగ్ల మాధ్యమం వైపే మొగ్గు చూపుతున్నారు. ఈ నేపథ్యంలో ఇంగ్లిష్ మాధ్యమాన్ని తప్పనిసరి చేస్తూ ప్రభుత్వం నిర్ణయం తీసుకుంది. కానీ కోర్టు దానిని కొట్టివేసింది. అలాకాకుండా ప్రతి తరగతిలోనూ రెండు సెక్షన్లు ఇంగ్లిష్ మీడియం, ఒక సెక్షన్ తెలుగు మీడియం పెట్టి ఉంటే సరిపోయేది.

ఇలా.. చాలా అంశాల్లో ప్రభుత్వం సరిగా వ్యవహరించకపోవడంతోనే కోర్టుల్లో ఎదురుదెబ్బలు తినాల్సి వస్తోందని అంటున్నారు. ఇకనైనా ఇలాంటి విషయాల్లో అధికార పార్టీ జాగరూకతతో వ్యవహరించాలని సూచిస్తున్నారు.