ఆంధ్రప్రదేశ్‌లో ఆత్మస్థుతి.. పర నింద.. ఇంకెన్నాళ్ళు.?

ఇన్ఫర్మేషన్ టెక్నాలజీ రంగంలో విశాఖకు మహర్దశ పట్టనుందట. అలాగని వైఎస్ జగన్ సర్కార్ చెబుతోంది. ఐటీ ఎమర్జింగ్ టెక్నాలజీస్ రీసెర్చ్ యూనివర్సిటీ ఏర్పాటుకు సర్కారు గ్రీన్ సిగ్నల్ ఇచ్చిందట. మంచిదే, విశాఖ అభివృద్ధికి ఏ ప్రభుత్వం ఎలాంటి చర్యలు చేపట్టినా అభినందించాల్సిందే. కానీ, నిజానికి.. రాష్ట్రంలో ఎవరు అధికారంలోకి వచ్చినా, విశాఖను అభివృద్ధి చేయలేకపోతున్నారు.. చేతనైనంతమేర నష్టం చేసి పోతున్నారు.

చంద్రబాబు హయాంలో విశాఖ చుట్టూ జరిగిన పబ్లిసిటీ స్టంట్లు అన్నీ ఇన్నీ కావు. కానీ, ఆ కాలంలోనూ విశాఖపట్నం ఐటీ రంగం పరంగా అభివృద్ధి చెందలేకపోయింది. విశాఖను చంద్రబాబు సర్కార్ నిర్లక్ష్యం చేసిందంటూ వైఎస్ జగన్ సర్కార్, రెండేళ్ళ నుంచీ భజన చేస్తూనే వుంది. ఆత్మ స్తుతి.. పర నింద.. అనేది ఆంధ్రప్రదేశ్ రాజకీయాల్లో సర్వసాధారణమైపోయింది. నిజానికి, తెలంగాణ రాష్ట్రం ఏర్పాటయిన కొత్తల్లో, సమైక్య పాలకులు చేసిన నష్టం.. అంటూ కొన్నాళ్ళపాటు అధికార తెలంగాణ రాష్ట్ర సమితి నుంచి మాటలు వినిపించేవి. ఆ తర్వాత ఆ ‘రొద’ తగ్గిపోయింది.

తెలంగాణ బలాబలాలేంటన్నదానిపై తెలంగాణ ప్రభుత్వం దృష్టిపెట్టింది.. మరింతగా తెలంగాణను అభివృద్ధి చేసుకుంటూ వెళుతోంది. చంద్రబాబు హయాంలో విశాఖకు అన్యాయం జరిగిందన్న వైసీపీ మాటలే నిజమనుకుందాం. మరి, గడచిన రెండేళ్ళలో విశాఖకు వైఎస్ జగన్ సర్కార్ చేసిందేంటి.? రెండేళ్ళ తర్వాత ఐటీ ఎమర్జింగ్ టెక్నాలజీస్ రీసెర్చ్ యూనివర్సిటీ ఏర్పాటుకు గ్రీన్ సిగ్నల్ ఇవ్వడం వైఎస్ జగన్ సర్కారు సాధించిన ఘనత అనుకోగలమా.?

విశాఖ రైల్వే జోన్ రావాలి.. విశాఖ సహా ఉత్తరాంధ్ర ప్రాంతంలో కొన్ని జాతీయ విద్యా సంస్థలు రావాలి.. విశాఖలో సినీ పరిశ్రమ అభివృద్ధికి అవకాశాలున్నాయి.. కానీ, వాటిని రాష్ట్ర ప్రభుత్వం సద్వినియోగం చేసుకోలేకపోయింది. నిజానికి, గడచిన రెండేళ్ళలో విశాఖ నుంచి కొన్ని ఐటీ సంస్థలు తమ కార్యాలయాల్ని హైద్రాబాద్, బెంగళూరు, చెన్నయ్ లాంటి నగరాలకు తరలించుకుపోయాయి. ఇవన్నీ కళ్ళ ముందు కనిపిస్తున్న వాస్తవాలే.