‘అదే జరిగితే.. చంద్రబాబు ఇంట్లో పాచి పని చేస్తా’: ఏపీ డిప్యూటీ సీఎం

చంద్రబాబు, లోకేశ్ పై ఏపీ డిప్యూటీ సీఎం కె.నారాయణ స్వామి సంచలన వ్యాఖ్యలు చేశారు. వారిద్దరూ ఒంటరిగా నిలబడి ఒక్క స్థానం గెలిచినా.. తాను చంద్రబాబు ఇంట్లో తాను పాచి పని చేసేందుకు సిద్ధమని ప్రకటించి సంచలనం రేపారు. మీడియాతో మట్లాడుతూ ఆయన ఈ వ్యాఖ్యలు చేశారు. చంద్రబాబు తపన ఎప్పుడూ ఉన్నవాళ్ల కోసమేనని.. సీఎం జగన్ మాత్రం లేనివారి కోసం తపిస్తారని అన్నారు. అప్పట్లో అధికారంలో ఉన్న చంద్రబాబు 23 మంది వైసీపీ ఎమ్మెల్యేలను అడ్డగోలుగా కొని.. రెడ్లకు మంత్రి పదవులు ఇచ్చారే కానీ.. ఒక్క ఎస్సీకి అవకాశం కల్పించారా.. అని ప్రశ్నించారు.

ఎస్సీల గురించి మాట్లాడే అర్హత చంద్రబాబుకు లేదని ఈ సందర్భంగా నారాయణ స్వామి అన్నారు. అప్పట్లో తనను కూడా టీడీపీలోకి లాక్కునేందుకు.. చంద్రబాబు ప్రయత్నించారని ఆరోపించారు. తాను డబ్బులకు, పదవులకు లొంగే వ్యక్తిని కాదని అప్పట్లోనే నిరూపించానని అన్నారు. తాను అవినీతి చేసినట్టు నిరూపిస్తే.. రాజకీయాల నుంచి శాశ్వతంగా తప్పుకొంటానని అన్నారు.