మోడీపై గొంతు చించుకుంటున్న రాహుల్ గాంధీ.. ఉపయోగమేంటి.?

చెవిటోడి ముందు శంఖం ఊదితే ప్రయోజనమేంటి.? అంటూ బీజేపీ పాలనపై దేశవ్యాప్తంగా వివిధ రాజకీయ పార్టీలు, సాధారణ ప్రజలూ విమర్శలు చేస్తున్నారు. దానిక్కారణం, కరోనా పాండమిక్ నేపథ్యంలో బీజేపీ నేతృత్వంలోని నరేంద్ర మోడీ సర్కార్ చేతులెత్తేయడమే. పశ్చిమబెంగాల్ అసెంబ్లీ ఎన్నికల మీద పెట్టిన ఫోకస్‌లో పదో వంతు ఫోకస్, కరోనా వైరస్ మీద పెట్టినా, దేశానికి ఇప్పుడీ దుస్థితి వచ్చి వుండేది కాదన్నది మెజార్టీ ప్రజల అభిప్రాయం. ఇందులో నిజం లేకపోలేదు కూడా.

కరోనా సెకెండ్ వేవ్‌కి సంబంధించి ప్రపంచంలో వివిధ దేశాలు తాము ఆ బాధను అనుభవిస్తూ, ఇతర దేశాలకు హెచ్చరికలు జారీ చేశాయి. ఆ హెచ్చరికల్ని మోడీ సర్కార్ లైట్ తీసుకుంది. దేశ ప్రజల్ని అప్రమత్తం చేయడంలో విఫలమైంది. ఫలితం చూస్తున్నాం కదా.. దేశంలో ఆక్సిజన్ కొరత, మందుల కొరత. ప్రతిరోజూ దేశవ్యాప్తంగా 4 వేలకు పైగా ప్రాణాలు పోతున్నాయ్.. కరోనా నేపథ్యంలో. ఇవి అధికారిక మరణాలు. స్మశానాల వద్ద నిఘా పెడితే, ఈ సంఖ్య రెట్టింపే వుంటుందో.. పది రెట్లు వుంటుందో అంచనా వెయ్యడానికీ భయపడే పరిస్థితి.

ఇదిలా వుంటే, ప్రధాని నరేంద్ర మోడీపై తూటాల్లాంటి విమర్శలు పేల్చుతున్నారు కాంగ్రెస్ నేత రాహుల్ గాంధీ. దేశంలో ఆక్సిజన్ దొరకట్లేదు.. మందులు దొరకట్లేదు.. అలాగే ప్రధాని నరేంద్ర మోడీ ఆచూకీ కూడా దొరకట్లేదంటూ తాజాగా ఓ సెటైర్ పేల్చారు రాహుల్ గాంధీ. ఇదేదో ఉత్త విమర్శ కాదు. విషయం వున్న విమర్శే. మొదటి వేవ్ సందర్భంగా ఇంటి బయటకొచ్చి కంచాలు, గరిటెలు పట్టుకుని బాదమన్నారు.. క్లాప్స్ కొట్టమన్నారు.. గంట కొట్టమన్నారు.. కొవ్వొత్తులు వెలిగించమన్నారు. కానీ, చివరికి కేంద్రం చేసిందేంటి.? ప్రజలకు ఏమీ చేయలేదు.

రెండో వేవ్‌లో పరిస్థితి మరీ దారుణం. లాక్ డౌన్ కూడా ప్రకటించలేకపోయింది కేంద్రం. మారటోరియం లేదు.. ఇంకేమీ లేదు. వ్యాక్సిన్ కూడా సరిగ్గా ఇవ్వలేకపోతోంది కేంద్రం. ఈ విషయమై కాంగ్రెస్ పోరాటాన్ని అభినందించాల్సిందే. కానీ, ఈ పోరాటం కాంగ్రెస్ పార్టీకి ఎంత లాభం.? కాంగ్రెస్ గొంతు నొక్కేయడం మోడీకి చిటికె వేసినంత పని.