ఆంధ్రప్రదేశ్ రాజధానిగా విశాఖ.! నమ్మగలమా.?

విశాఖపట్నం, ఆంధ్రప్రదేశ్ రాష్ట్రానికి పూర్తిస్థాయి రాజధాని కాబోతోందట. అలాగని వైసీపీ వర్గాల్లో చర్చ జరుగుతోంది. వైసీపీ అనుకూల మీడియా నుంచి లీకులు బయటకు వస్తున్నాయి. ఈసారి ఏ చిన్న సాంకేతిక పొరపాట్లకూ తావు లేకుండా పక్కాగా బిల్లు పెట్టి, చట్టంగా మార్చి.. విశాఖకు రాజధాని హోదా ఇచ్చి తీరాలని వైఎస్ జగన్ సర్కారు భావిస్తోందట.

ఎగ్జిక్యూటివ్ క్యాపిటల్ అన్న పేరుతో గతంలోనే విశాఖకు రాజధాని హోదా ఇచ్చేందుకు వైఎస్ జగన్ సర్కారు ప్రయత్నించిందిగానీ, న్యాయపరమైన చిక్కుల కారణంగా అది సాధ్యపడలేదు. వికేంద్రీకరణ పేరుతో తెచ్చిన మూడు రాజధానుల బిల్లుని ప్రభుత్వమే వెనక్కి తీసుకోవాల్సి వచ్చిన సంగతి తెలిసిందే.

‘ఈసారి మాత్రం పక్కా.. విశాఖ రాజధాని అయి తీరుతుంది..’ అంటూ పలువురు మంత్రులు కుండబద్దలుగొట్టేస్తున్నారు. అమరావతి విషయంలో ఎటూ జగన్ సర్కారుకి చిత్తశుద్ధి లేదు. కానీ, కర్నూలుని రాజధాని చేస్తామన్నారు కదా, ఆ దిశగా సమాలోచనలు ఏమైనా జరుగుతున్నాయా.? అంటే, ప్రస్తుతానికి అంత సానుకూల చర్చ కర్నూలు గురించి వైసీపీలో జరగడంలేదట.

విశాఖ మాత్రమే.. కేవలం విశాఖ మీదనే.. అన్నట్టుగా అధికార వైసీపీ ఫోకస్ వున్నట్లు కనిపిస్తోంది. విశాఖకు వున్న ప్రత్యేకతలు అలాంటివి మరి. నిజానికి, చంద్రబాబు హయాంలోనే విశాఖపట్నం, రాష్ట్రానికి రాజధాని అయి వుండాలి. కొన్ని కారణాలతో విశాఖకు వచ్చిన ఆ అవకాశాన్ని అప్పటి ‘పచ్చ’పాత ప్రభుత్వం అమరావతికి తన్నుకుపోయింది.

అయితే, అమరావతి పొట్టకొట్టి.. విశాఖను అందలం ఎక్కించాలని విశాఖ వాసులుగానీ, ఉత్తరాంధ్రవాసులుగానీ కోరుకోరు. విశాఖకు రాజధాని వస్తోందంటే, ఆ పేరుతో దోపిడీ పెరిగిపోతుందన్న భయం కూడా స్థానికంగా వినిపిస్తోంది. మరోపక్క, ఏదో ఒకటి.. రాష్ట్రానికైతే రాజధాని వుండాలి కదా.. ఈ రాజధాని సంక్షోభం నుంచి ఎలాగోలా రాష్ట్రం గట్టెక్కితే చాలన్న భావన కూడా చాలామందిలో వుంది.

సంక్షోభంలోకి నెట్టేసి, చెయ్యందిస్తున్నట్లుగా చేసి.. తమ పంతం నెగ్గించుకోవడం నయా రాజకీయ పాలనా సూత్రంగా భావించాలేమో.!