అన్యాయం.. ఆర్జీవీ సినిమాల్ని దాంతో పోల్చుతారా.?

పెద్ద చిక్కే వచ్చి పడింది.. రామ్‌ గోపాల్‌ వర్మ సినిమాల్ని ‘జబర్దస్త్‌’ స్కిట్స్‌తో పోల్చుతున్నారు కొందరు. అదీ ‘అమ్మ రాజ్యంలో కడప బిడ్డలు’ సినిమా ప్రమోషన్స్‌ షురూ అయ్యాక ఈ పోలిక మరీ ఎక్కువైపోయింది. సినిమా విడుదలయ్యాక రివ్యూల్లోనూ, సోషల్‌ మీడియాలోనూ ‘జబర్దస్త్‌’ కామెడీ స్కిట్స్‌తోనే పోలిక పెడుతున్నారు అందరూ.

అయితే, ఇక్కడ జబర్దస్త్‌ అభిమానులు అస్సలేమాత్రం ఒప్పుకోవడంలేదు.. ఆ కామెడీ షోతో, ఈ సినిమాని పోల్చడాన్ని. ‘అదొక స్క్రాప్‌.. ఆ సినిమాని దేనితోనూ పోల్చలేం..’ అని ఓ నెటిజన్‌ తన అభిప్రాయాన్ని కుండబద్దలుగొట్టేశాడు. ‘దయచేసి జబర్దస్త్‌ ప్రోగ్రామ్‌ స్థాయి తగ్గించేలా కంపేరిజన్స్‌ పెట్టొద్దు.. అమ్మ రాజ్యంలో అనేది అసలు సినిమా కాదు, కనీసం స్కిట్‌ కూడా కాదు..’ అని ఇంకో నెటిజన్‌ అభిప్రాయపడుతున్నాడు.

‘ఇంతోటి సినిమాకేనా.. కుట్రలు పని అడ్డుకోవడం..’ అని మరికొందరు ఎద్దేవా చేస్తున్నారు. టైటిల్‌ దగ్గర్నుంచి, రిలీజ్‌ దాకా రామ్‌ గోపాల్‌ వర్మ ‘అమ్మ రాజ్యంలో కడప బిడ్డలు’ సినిమాపై నానా యాగీ చేశారు. ఔను, ఆయన చేసినంత యాగీ ఈ సినిమాపై ఇంకెవరూ చేసి వుండరేమో.

తన సినిమాపై పబ్లిసిటీ పేరుతో వర్మ చేసిన యాగీనే ఆ సినిమాకి శాపంగా మారింది. ‘యాగీ’ చేయడం మీదున్న శ్రద్ధ, సినిమా తీయడం మీద పెట్టి వుంటే.. ‘అమ్మ రాజ్యంలో కడప బిడ్డలు’ ఇలా తగలడేది కాదన్నది మెజార్టీ అభిప్రాయం.

అయితే, వర్మ రూటే సెపరేటు. ‘అంతా నా ఇష్టం.. సినిమాని చూడాలని నేనెవర్నీ బలవంతం చేయలేదు కదా..’ అంటాడాయన. పాపం వైసీపీ అభిమానులు, చంద్రబాబు మీదా, లోకేష్‌ మీదా, పవన్‌ కళ్యాణ్‌ మీదా, కెఎ పాల్‌ మీదా అసహనంతో, రామ్‌గోపాల్‌ వర్మ మీద నమ్మకంతో.. డబ్బులు ఖర్చు చేసి థియేటర్లకు వెళ్ళి జేబులు గుల్ల చేసుకున్నారంటూ సోషల్‌ మీడియాలో పడ్తున్న సెటైర్లు ఈ సినిమా స్థాయిని చెప్పకనే చెబుతున్నాయి.