గుజరాత్‌ లో అధికారం ఇవ్వండి ఢిల్లీ మోడల్ అమలు చేస్తాం

సామాన్యుల పార్టీగా రాజకీయంలో ఆమ్ ఆద్మీ పార్టీ తో అడుగు పెట్టిన అరవింద్ కేజ్రీవాల్ ఢిల్లీలో వరుసగా అధికారాన్ని దక్కించుకొని ఇప్పుడు దేశ వ్యాప్తంగా ఆమ్ ఆద్మీ పార్టీని విస్తరించే దిశగా అడుగులు వేస్తున్నారు. ఇటీవలే పక్క రాష్ట్రం పంజాబ్ లో తమ పార్టీ జెండా ఎగురవేసి అక్కడ అధికారాన్ని చేజిక్కించుకున్నారు. ఆమ్ ఆద్మీ పార్టీ కన్వీనర్ అరవింద్ కేజ్రీవాల్ ఇప్పుడు గుజరాత్ పై దృష్టి పెట్టారు. ప్రధాని నరేంద్ర మోడీ యొక్క సొంత రాష్ట్రమైన గుజరాత్ లో ఆమ్ ఆద్మీ పార్టీని అధికారంలోకి తీసుకు వచ్చేందుకు ఢిల్లీ ముఖ్యమంత్రి అరవింద్ కేజ్రీవాల్ తీవ్ర ప్రయత్నాలు చేస్తున్నారు.

తాజాగా గుజరాత్‌ లోని బరూచ్ లో ఆయన పర్యటించారు. ఈ సందర్బంగా మాట్లాడుతూ… గుజరాత్ విద్యా వ్యవస్థ అత్యంత దయనీయ పరిస్థితుల్లో ఉందని, ఆమ్ ఆద్మీ పార్టీని గెలిపించి అధికారం కట్టబెడితే ఢిల్లీ మోడల్‌ విద్యా వ్యవస్థను ప్రవేశ పెడతామని హామీ ఇచ్చారు. ప్రతి విద్యార్థికి అత్యున్నత విద్యను అందించేందుకు ఆమ్ ఆద్మీ పార్టీ ప్రభుత్వం పని చేస్తుందని ఆయన హామీ ఇచ్చారు. గుజరాత్ ఎన్నికలు సమీపిస్తున్న నేపథ్యంలో అక్కడ మెజార్టీ స్థానాలు దక్కించుకునేందుకు ఆమ్ ఆద్మీ పార్టీ చేస్తున్న ప్రయత్నాలు ఎంత వరకు సఫలం అవుతాయో చూడాలి.