మంచు విష్ణు ఉవాచ: పవన్ కళ్యాణ్ వర్సెస్ టాలీవుడ్.!

తెలుగు సినిమా ఒక వైపు.. పవన్ కళ్యాణ్ ఇంకో వైపు.. ఇదీ సినీ నటుడు మంచు విష్ణు ఉవాచ. ‘నేను తెలుగు సినిమా పరిశ్రమ వైపు నిలబడ్డాను. ప్రకాష్ రాజ్ ఎవరి వైపు నిలబడతారు.? తెలుగు సినిమా వైపా.? పవన్ కళ్యాణ్ వైపా.?’ అంటూ అసలు విషయాన్ని చెప్పకనే చెప్పేశాడు మంచు విష్ణు.

‘మా’ అధ్యక్ష ఎన్నికల నేపథ్యంలో తెరపైకి వచ్చిన వింత వాదన ఇది. తెలుగు సినిమా గురించే జనసేన అధినేత పవన్ కళ్యాణ్ మాట్లాడారు. ఆయనకు మద్దతుగా సినీ నటులు నాని, కార్తికేయ, బ్రహ్మాజీ తదితరులు స్పందించారు. అయితే, తెలుగు ఫిలిం ఛాంబర్ ఆఫ్ కామర్స్ మాత్రం, ‘ఆయా వ్యక్తుల వ్యక్తిగత అభిప్రాయాలు వేరు. ఛాంబర్ పరంగా, తెలుగు రాష్ట్రాల ప్రభుత్వాల నుంచి సాయం అర్థిస్తున్నాం. ప్రభుత్వాలు లేకపోతే, పరిశ్రమ లేదు.. మా సమస్యల పట్ల ప్రభుత్వాలు సానుకూలంగా స్పందిస్తాయనే నమ్మకంతో వున్నాం..’ అని పేర్కొంది.

దీనర్థం, పవన్ కళ్యాణ్ వేరు.. తెలుగు సినిమా పరిశ్రమ వేరు అని కాదు. కానీ, మంచు విష్ణు అలా అనుకుంటున్నట్టున్నారు. మంచు విష్ణు భావన నిజంగా అదే అయితే, పవన్ కళ్యాణ్ ఓటు కూడా తనకే పడుతుందని చెప్పడమేంటి.? పవన్ కళ్యాణ్ ఓటు మంచు విష్ణుకి కావాలి. కానీ, ఆ పవన్ కళ్యాణ్ వైపు ప్రకాష్ రాజ్ నిలబడితే.. అది తెలుగు సినీ పరిశ్రమకు వ్యతిరేకం. అత్యంత నీఛ స్థితికి దిగజారిపోయిన సాధారణ రాజకీయాల్ని మించి, సినిమా పరిశ్రమలో రాజకీయాలు దిగజారిపోయాయనడానికి ఇంతకన్నా నిదర్శనం ఇంకేం కావాలి.?

పరిశ్రమ సమస్యలపై పవన్ కళ్యాణ్ మాట్లాడితే, పరిశ్రమకు దూరంగా పవన్ కళ్యాణ్‌ని నెట్టేసి, ఆయన్ని వేరు చేసి చూపించడం ద్వారా కేవలం ‘మూవీ ఆర్టిస్ట్స్ అసోసియేషన్’ ఎన్నికల్లో లబ్ది పొందాలని చూడటమా.? పైగా, ఇది తెలుగు సినిమా నటీనటుల ఆత్మగౌరవమని చెప్పడమా.? ముందు ముందు ఇంకెన్ని చిత్ర విచిత్రాలు ‘మా’ ఎన్నికల్లో చూడాల్సి వస్తుందోగానీ.. తెలుగు సినీ పరిశ్రమ స్థాయి రోజురోజుకీ మరింత దిగజారిపోయేలా.. ఈ ఎన్నికల వ్యవహారం నడుస్తున్నట్టుందనే భావన మాత్రం సగటు సినీ ప్రేక్షకుల్లో వ్యక్తమవుతోంది.

పరిశ్రమ సమస్యల గురించి పరిశ్రమకు చెందిన వ్యక్తి మాట్లాడితే, పరిశ్రమకు ఆయన్ని దూరంగా చేసిన మాట్లాడటం ఏ నైతిక విలువలకి నిదర్శనం.?