బ్రేకింగ్ న్యూస్: గ్రేటర్ దెబ్బతో టీపీసీసీ చీఫ్ పదవికి ఉత్తమ్ కుమార్ రెడ్డి రాజీనామా

జీహెచ్ఎంసీ ఎన్నికల ఫలితాలు కాంగ్రెస్ పార్టీకి శరాఘాతంలా తగిలాయి. 150 డివిజన్లకు 148 డివిజన్ల ఫలితాలు వెల్లడైతే కాంగ్రెస్ కు కేవలం 2 స్థానాలే రావడం ఆ పార్టీ దీనస్థితికి అద్దం పడుతోంది. ఈ ఫలితాలతో తీవ్ర మనస్తాపానికి గురైన టీపీసీసీ అధ్యక్షడు ఉత్తమ్ కుమార్ రెడ్డి కీలక నిర్ణయం తీసుకున్నారు. కాంగ్రెస్ పార్టీ ఓటమికి నైతిక బాధ్యత వహిస్తూ తన పదవికి రాజీనామా చేశారు. ఈ సందర్భంగా తన రాజీనామా లేఖను అధిష్టానానికి పంపించారు.

తన నిర్ణయాన్ని ఆమోదించాలంటూ ఏఐసీసీక రాసిన లేఖలో కోరారు. కొత్త టీపీసీసీ అధ్యక్షుడిగా మరొకరిని ఎన్నుకోవలని కోరారు. ఉత్తమ్ రాజీనామా కాంగ్రెస్ వర్గాల్లో సంచలనం రేపింది. 2016లో టీఆర్ఎస్ గాలికి కేవలం రెండు స్థానాలే గెలుచుకుంది. ఇప్పుడు ప్రభుత్వ వ్యతిరేకత ఉన్నా కూడా పార్టీ పుంజుకోకపోవడంపై ఆయన తీవ్ర మనస్తాపానికి గురై ఈ నిర్ణయం తీసుకున్నట్టు తెలుస్తోంది. ఉత్తమ్ నిర్ణయంపై ఢిల్లీ అధిష్టానం నుంచి ఎటువంటి నిర్ణయం ఇంకా వెలువడలేదు.

మరోవైపు గ్రేటర్ ఎన్నికల ఫలితాల్లో హంగ్ వచ్చింది. 150 డివిజన్లలో మేజిక్ ఫిగర్ 76 ఏపార్టీకి రాలేదు. ప్రస్తుతానికి టీఆర్ఎస్ కు 56, బీజేపీకి 47, ఎంఐఎంకు 43, కాంగ్రెస్ కు 2 సీట్లు వచ్చాయి. మిగిలిన రెండు స్థానాలు కూడా బీజేపీ మెజారిటీలో ఉందని తెలుస్తోంది. జీహెచ్ఎంసీ ఎన్నికల అంకం నేడు వెల్లడైన ఫలితాలతో దాదాపు ముగిసింది. అసెంబ్లీ ఎన్నికల సమరం తరహాలో జరిగిన ఈ ఎన్నికలను అన్ని పార్టీలు ప్రతిష్టాత్మకంగా తీసుకున్నాయి.