ఇవి మామూలు మాస్కులు కాదండోయ్!

ఓ వైపు ప్రపంచం కరోనా మహమ్మారితో అల్లకల్లోలంలో కొట్టుమిట్టాడుతున్నా.. కొంతమంది మాత్రం ఆడంబరాల్లో మునిగి తేలుతున్నారు. ముఖానికి వేసుకునే మాస్కుల్లోనూ గొప్పలు ప్రదర్శిస్తున్నారు. మామూలు మాస్కులు ధరిస్తే తన గొప్పదనం ఏమి ఉంటుందనే భావనతో బంగారం, వజ్రాలు పొదిగిన మాస్కులు వేసుకుంటున్నారు. ఇప్పటివరకు మ్యాచింగ్ వరకే పరిమితమైన మాస్కులు.. ఖరీదైన వ్యవహారంగా మారుతున్నాయి. వినియోగదారుల అభిరుచులకు తగినట్టుగానే వజ్రాల వ్యాపారులు కూడా వివిధ రకాల ధరల్లో మాస్కులు రూపొందించి విక్రయిస్తున్నారు. క

రోనా మహమ్మారి విపరీతంగా వ్యాపిస్తుండటంతో ప్రస్తుతం మాస్కు అనేది జీవితంలో భాగమైపోయిన సంగతి తెలిసిందే. ప్రభుత్వాలు కూడా మాస్కు ధరించాల్సిందేనని ఆదేశాలిచ్చింది. లేకుంటే జరిమానాలు కూడా విధిస్తోంది. ఈ నేపథ్యంలో జనాలు కూడా తమ శక్తి మేరకు జేబురుమాలు నుంచి ఎన్-95 వరకు వివిధ రకాల మాస్కులు ధరిస్తున్నారు.

అయితే, సూరత్ కు చెందిన ఓ వ్యక్తికి ఇటీవల పెళ్లి కుదిరింది. దీంతో అందరూ ధరించినట్టు కాకుండా తాను, పెళ్లికూతురు విభిన్నమైన మాస్కులు ధరించాలని భావించాడు. వెంటనే అక్కడి ఓ నగల దుకాణంలోకి వెళ్లి విషయం చెప్పాడు. దీంతో ఆ దుకాణం యజమాని దీపక్ చోక్సీ.. వజ్రాలు పొదిగిన మాస్కు తయారుచేసి చూపించాడు. దానిని చూసి పెళ్లికొడుకు ఫిదా అయ్యాడు. దీంతో చోక్సీకి ఇదేదో బాగానే ఉంది అని భావించి వజ్రాల మాస్కులు రూపొందించి విక్రయానికి ఉంచాడు. అందులో వినియోగించే బంగారం, వజ్రాలను బట్టి రూ.లక్షన్నర నుంచి రూ.4 లక్షల విలువైన మాస్కులు రూపొందించి అమ్ముతున్నారు. జనాలు కూడా బాగానే కొంటున్నారండోయ్.

ఇటీవల పుణెకు చెందిన శంకర్ కురాడే రూ.2.89 లక్షల విలువ చేసే బంగారు మాస్కు తయారుచేసుకుని ఔరా అనిపించగా.. తాజాగా వజ్రాల మాస్కులు ఆశ్చర్యం కలిగిస్తున్నాయ్.