‘ఓటీటీ’ దుమ్ము దులిపే ‘సినిమా’ కావాలి

లాక్ డౌన్ కారణంగా రెండు నెలలుగా థియేటర్లు మూతబడ్డాయి. ఇప్పటికీ థియేటర్ల పునఃప్రారంభంపై అనిశ్చితి కొనసాగుతూనే ఉంది. ఒకవేళ తెరిచినప్పటికీ ప్రేక్షకులు మునుపటిలా థియేటర్లకు వస్తారో, రారో అనే అనుమానాలు రోజురోజుకీ పెరుగుతూనే ఉన్నాయి. ఈ పరిస్థితుల్లో నిర్మాతలకు వరప్రదాయనిలా కనిపించాయి ‘ఓవర్ ది టాప్’ (ఓటీటీ) వేదికలు.

ఈ నేపధ్యంలో ఓటీటీ వేదికలు నేరుగా వెబ్ రిలీజ్ చేయమంటూ చిన్న మరియు మధ్య స్థాయి నిర్మాతలకు గాలం వేస్తున్నాయి. ఆయా ఆఫర్లకు పడిన కొందరు నిర్మాతలను ఓటీటీపై తమ సినిమాలను విడుదల చేయటానికి ముందుకు వస్తున్నారు. నిర్మాతలను ఒప్పించే రేసులో అమెజాన్ ప్రైమ్ కాస్త ముందున్నదనే చెప్పాలి. శుక్రవారం జ్యోతిక నటించిన ‘పొన్మగల్ వందాళ్’ సినిమాను విడుదల చేసిన ఈ సంస్థ ఇప్పటికే వివిధ భాషల్లో పదికి పైగా సినిమాల డిజిటల్ హక్కులను సొంతం చేసుకుందని సమాచారం.

అయితే ఈ సినిమాకు మిక్సిడ్ రివ్యూలు, నెగటివ్ ఫీడ్ బ్యాక్ రావటంతో నిర్మాతలు ఆశించిన ఫలితం మాత్రం దక్కలేదు. ఈ సినిమాకు ముందు విడుదలయిన మరో తమిళ సినిమా పరిస్థితి కూడా అదే. రెండు నెలల క్రితం చిన్న బడ్జెట్ చిత్రం ‘అమృతారామమ్’ జీ5 వేదికగా విడుదలయింది. నేరుగా డిజిటల్ రిలీజ్ చేసుకుంటున్న తొలి తెలుగు చిత్రంగా పబ్లిసిటీ జరుపుకున్న ఈ చిత్రం కూడా నెగటివ్ ఫలితాన్నే మూటగట్టుకుంది. ఇండిపెండెంట్ సినిమాగా విడుదలయిన నవదీప్ ‘రన్’ డిజాస్టర్ గా నిలిచింది.

ఓటీటీ వేదికలపై విడుదలవుతున్న ఏ ఒక్క సినిమా అయినా పాజిటివ్ ఫీడ్ బ్యాక్ సాధిస్తే మిగిలిన నిర్మాతలు ఈ బాటలో ప్రయాణం చేసే అవకాశం ఉంది. ప్రస్తుతం థియేటర్లు లేని కాలంలో యూట్యూబ్ ఛానళ్ళు మరియు ఓటీటీ వేదికలే వినోద ప్రత్యామ్నాయాలు. ఓటీటీ సంస్థలు కూడా కంటెంట్ కోసం కాకుండా కంటెంట్ ఉన్న సినిమాలను విడుదల చేస్తే మంచి వినోదాన్ని అందించిన వారవుతారు.