యాప్స్ తీసేస్తే చైనా దారికొస్తుందా?

కరోనా వైరస్ కు కారణమైన చైనాపై చాలా దేశాలు ఆగ్రహంతో ఉన్నాయి. డ్రాగన్ కంట్రీని ఆంక్షల చట్రంలో బంధించాలని అమెరికా తెగ ప్రయత్నాలు చేస్తోంది. ఆ దేశం నుంచి తమ కంపెనీలను ఉపసంహరిస్తోంది. మరోవైపు భారత్ తో కయ్యానికి చైనా కాలు దువ్వుతోంది. ప్రపంచవ్యాప్తంగా తనకు వ్యతిరేకంగా జరుగుతున్న పరిణామాల నుంచి అందరి దృష్టి మళ్లించేందుకు వీలుగా సరిహద్దుల్లో కవ్వింపు చర్యలకు పాల్పడుతోంది. అటు నేపాల్, ఇటు పాకిస్థాన్ లను కూడా భారత్ పైకి రెచ్చగొడుతోంది.

ఈ నేపథ్యంలో చైనా యాప్స్ ను బాయ్ కాట్ చేయాలనే నినాదంలో భారత్ లో ఊపందుకుంది. దీంతో వన్ టచ్ యాప్ ల్యాబ్స్ అనే సంస్థ ‘రిమూవ్ చైనా యాప్స్’ పేరుతో ఓ సరికొత్త యాప్ అభివృద్ధి చేసింది. దీనిని మన ఫోన్ లో ఇన్ స్టాల్ చేసుకుంటే మన ఫోన్ లో ఉన్న చైనాకు చెందిన అన్ని యాప్స్ ని కనిపెట్టి తొలగించేస్తుంది. ఈనెల 17న ఈ యాప్ విడుదల కాగా, రెండు వారాల్లోనే ఏకంగా పది లక్షల మంది డౌన్ లోడ్ చేసుకున్నారు.

అయితే, యాప్స్ ని తీసేసినంత మాత్రాన చైనా దారికొస్తుందా అనేది సందేహమే. చైనాకు చెందిన యాప్స్ తీసేస్తే ఆయా కంపెనీలకు నష్టం వస్తుంది. కానీ చైనాకు దారికి తేవడానికి అది సరిపోదని అంటున్నారు. చైనాకు చెందిన ఉత్పత్తులను కొనుగోలు చేయడం మానేస్తే.. అది డ్రాగన్ కంట్రీపై తీవ్ర ప్రభావం చూపిస్తుందని చెబుతున్నారు.

చైనా వస్తువులకు భారత్ అతిపెద్ద మార్కెట్ గా ఉంది. ఆ దేశంలో తయారయ్యే చాలా వస్తువులు భారత్ లో విరివిగా లభ్యమవుతాయి. తక్కువ ధరలకే అవి లభిస్తుండటం వల్ల మనోళ్లు కూడా వాటిపై మక్కువ చూపిస్తున్నారు. ఫలితంగా ఏటా కోట్లాది రూపాయల మొత్తాన్ని మన నుంచి చైనా ఆర్జిస్తోంది. ఈ నేపథ్యంలో చైనా యాప్స్ తో పాటు చైనా వస్తువులను బహిష్కరించాలని పలువురు సూచిస్తున్నారు. ఇందుకు సంబంధించి భారత ప్రభుత్వం నేరుగా నిర్ణయం తీసుకోకపోయినా.. స్వదేశీ ఉత్పత్తులను కొనుగోలు చేయాలని ప్రధాని మోదీ ఇటీవల పిలుపునిచ్చారు.

ఈ విషయంలో భారతీయులంతా ఏకమై చైనా వస్తువులను బాయ్ కాట్ చేస్తే.. అది డ్రాగన్ కంట్రీ ఆర్థిక వ్యవస్థపై పెద్ద ప్రభావం చూపడం ఖాయమని చెబుతున్నారు. మన సరిహద్దుల్లో ఉద్రిక్తతలు రెచ్చగొడుతున్న చైనాకు బుద్ధి చెప్పడానికి ఇదే సరైన మార్గమని స్పష్టంచేస్తున్నారు. త్వరలోనే ఈ ఉద్యమం కూడా మొదలుకావాలని ఆశిద్దాం.