ఆ వైసీపీ ఎమ్మెల్సీలపై వేటు ఖాయమా?

కరోనా విజృంభిస్తున్న తరుణంలోనూ ఏపీలో రాజకీయాలు రంజుగా సాగుతున్నాయి. అధికార, విపక్షాలు ఒకరిపై మరొకరు పై చేయి సాధించడానికి అందుబాటులో ఉన్న అన్ని ప్రయత్నాలూ చేస్తున్నారు. ఒకరిపై విమర్శలు, ఆరోపణలు షరా మామూలుగానే సాగుతున్నాయి. ఇప్పటికే కోర్టుల్లో ఎదురుదెబ్బలు తగిలి తీవ్ర అసహనంతో ఉన్న వైసీపీకి తెలుగుదేశం పార్టీ మరో షాక్ ఇవ్వడానికి సన్నద్ధమైంది. మండలి రద్దుకు ముందు టీడీపీ నుంచి వైసీపీలోకి ఫిరాయించిన ఎమ్మెల్సీలు పోతుల సునీత, శివనాథ్ రెడ్డిలపై అనర్హత వేటు వేయడానికి రంగం సిద్ధం చేస్తోంది.

మూడు రాజధానుల బిల్లు, సీఆర్డీఏ సవరణ బిల్లులపై టీడీపీ విప్ ధిక్కరించి వారిద్దరూ ప్రభుత్వానికి అనుకూలంగా ఓటేశారు. అయినప్పటికీ ఆ బిల్లు మండలిలో వీగిపోయింది. దీంతో మండలి రద్దు చేయాలని ప్రభుత్వం నిర్ణయించి ఆ మేరకు కేంద్రానికి సిఫార్సు చేసింది. ప్రస్తుతం అది కేంద్రం వద్ద పెండింగ్ లో ఉంది. మరోవైపు పార్టీ విప్ ధిక్కరించిన ఎమ్మెల్సీలపై వేటు వేయాలంటూ టీడీపీ ఇప్పటికే మండలి చైర్మన్ కు ఫిర్యాదు చేసింది. ఈ నేపథ్యంలో ఈ అంశంపై జూన్ 3న తన ముందు హాజరై వివరణ ఇవ్వాలంటూ మండలి చైర్మన్ ఆ ఎమ్మెల్సీలను ఆదేశించారు. వారు తమ వివరణ ఇచ్చిన తర్వాత ఆ ఇద్దరిపై అనర్హత వేటు వేయడం ఖాయమనే చెబుతున్నారు.

అసెంబ్లీలో పూర్తి మెజార్టీ ఉన్న వైసీపీకి మండలిలో బలం లేదు. దీంతో అక్కడ టీడీపీ అభీష్టం మేరకే ఏదైనా జరుగుతుంది. ఈ నేపథ్యంలో ఆ ఎమ్మెల్సీలపై వేటు వేయించడం లాంఛనమే అని సమాచారం. ఆ మేరకు తెలుగుదేశం పార్టీ వేగంగా పావులు కదుపుతోంది. తాము అధికారంలో ఉన్నప్పుడు వైసీపీ నుంచి టీడీపీలోకి ఫిరాయించిన 23 మంది ఎమ్మెల్యేల విషయంలో ఎలాంటి నిర్ణయం తీసుకోకుండా ఐదేళ్లూ గడిపేసిన తెలుగుదేశం పార్టీ.. ఇప్పుడు మాత్రం ఆ ఎమ్మెల్సీలపై సాధ్యమైనంత తొందరగా వేటు వేయించి అధికార పార్టీకి ఝలక్ ఇవ్వాలని భావించడం గమనార్హం.

టీడీపీ ఎమ్మెల్యేలను అధికార పార్టీ తన వైపు తిప్పుకొంటున్న తరుణంలో ఎమ్మెల్సీలపై వేటు వేయడం ద్వారా తానేంటో చెప్పాలని భావిస్తోంది. మండలి రద్దు బిల్లు పార్లమెంటులో ఎప్పుడు ఆమోదం పొందుతుందో తెలియన పరిస్థితి నెలకొంది. దీంతో అసెంబ్లీ వర్షాకాల సమావేశాలు ప్రారంభమైతే మండలిని కూడా సమావేశపరచక తప్పదు. ఇది వైసీపీకి ఎంతమాత్రం ఇష్టం లేదు. సాధ్యమైనంత త్వరగా మండలి రద్దు ప్రక్రియ పూర్తి చేసి.. రాజధాని తరలింపు మొదలుపెట్టాలని ఆ పార్టీ భావిస్తోంది. ఈ నేపథ్యంలో టీడీపీ వేసిన ఎత్తుగడను అధికార పార్టీ ఎలా ఎదుర్కొంటుందో చూడాలి.