చంద్రబాబు: స్వపక్షాన్నీ కొనక తప్పదా?

ఏడాది క్రితం జరిగిన ఎన్నికల్లో ఓటమి పాలైన తెలుగుదేశం పార్టీ ప్రస్తుతం విచిత్రమైన పరిస్థితుల్లో ఉంది. భారీ మెజార్టీతో అధికారంలోకి వచ్చిన వైఎస్సార్ సీపీని తట్టుకుని మరో నాలుగేళ్లు ఎలా పోరాడాలా అని తర్జనభర్జన పడుతోంది. మామూలుగా అయితే ఈ పరిస్థితి ఉండేది కాదు. కానీ టీడీపీ ఎమ్మెల్యేలను ఆ పార్టీకి దూరం చేసేందుకు అధికార పార్టీ ఆపరేషన్ ఆకర్ష్ చేపట్టడంతో ఈ పరిస్థితి తలెత్తింది. అధికార పార్టీ ప్రలోభాలు, ఒత్తిళ్లకు తమ ఎమ్మెల్యేలు లొంగకుండా చూసుకోవాల్సిక క్లిష్ట బాధ్యత టీడీపీ అధినేత చంద్రబాబుపై పడింది.

ఇప్పటికే బాబు ప్రతిపక్ష హోదాకు గండి కొట్టే దిశగా అధికార పార్టీ తన వ్యూహాలకు పదును పెట్టి ముందుకెళుతోంది. ఇందులో భాగంగా చాలానెలల క్రితమే టీడీపీ ఎమ్మెల్యేలు వల్లభనేని వంశీ, మద్దాల గిరి, కరణం బలరాంలని ఆ పార్టీ వీడేలా చేసింది. తాజాగా ఏలూరి సాంబశివరావు, అనగాని సత్యప్రసాద్ కూడా టీడీపీకి ఝలక్ ఇచ్చేందుకు సిద్ధమయ్యారు. ప్రస్తుతం జరుగుతున్న మహానాడుకు వీరిద్దరూ హాజరు కాలేదు. మాజీ మంత్రి గంటా శ్రీనివాసరావు కూడా మహానాడులో పాల్గొనలేదు.

ఇవన్నీ ఇలా ఉంటే.. ఎమ్మెల్యే గొట్టిపాటి రవితోపాటు విశాఖకు చెందిన ఇద్దరు ఎమ్మెల్యేలు పార్టీ వీడటానికి సన్నద్ధంగా ఉన్నారనే ప్రచారం జరుగుతోంది. ఇదే జరిగితే చంద్రబాబు ప్రతిపక్ష హోదాకు గండి పడినట్టే. దీంతో బాబు అప్రమత్తమయ్యారని తెలుస్తోంది. తన ప్రతిపక్ష హోదాతోపాటు పార్టీని కాపాడుకోవడానికి వ్యూహం సిద్ధం చేశారని సమాచారం.

అధికారంలో ఉన్నప్పుడు డబ్బులు వెదజల్లి, మంత్రి పదవులు ఎరవేసి వైసీపీకి చెందిన 23 మంది ఎమ్మెల్యేలు, ముగ్గురు ఎంపీలను చంద్రబాబు తన వైపు తిప్పుకున్నారు. ఇప్పుడు అదే వ్యూహాన్ని సొంత పార్టీకి చెందిన ఎమ్మెల్యేల విషయంలోనూ అనుసరించాలని యోచిస్తున్నట్టు ప్రచారం జరుగుతోంది.

పార్టీని వీడకుండా ఉంటే ఒనగూరే ప్రయోజనాలు చెప్పడంతోపాటు ఆర్థికంగా ఎంత లబ్ధి చేకూరుతుందో వివరించినట్టు చెబుతున్నారు. మండలి రద్దు సందర్భంగా పార్టీ ఎమ్మెల్సీలు అధికార పార్టీ వైపు వెళ్లకుండా చూసేందుకు బాబు ఇదే వ్యూహం అనుసరించారు. మండలి రద్దయినా సరే.. ఎమ్మెల్సీల జీతభత్యాలకు ఎలాంటి లోటూ రాకుండా చూసుకుంటామని భరోసా ఇవ్వడంతో ఎవరూ అధికార పార్టీ వైపు వెళ్లలేదు.

దీంతో అక్కడ విజయవంతమైన ఈ వ్యూహాన్ని ఎమ్మెల్యేలకూ వర్తింపజేయాలని బాబు భావిస్తున్నట్టు సమాచారం. పెద్ద మొత్తంలో ఆర్థిక ప్రయోజనం కల్పిస్తామని హామీ ఇస్తున్నట్టు తెలుస్తోంది. మరి ఇది ఎంతవరకు విజయవంతం అవుతుందో వేచి చూడాల్సిందే.