రెండు వైసీపీ గ్రూపుల మధ్య వర్గ పోరు.. 8 మందికి గాయాలు.!

ఒక ఊరిలో రెండు విభిన్న రాజకీయ పార్టీల కార్యకర్తల మధ్య ప్రతి విషయంలోనూ విభేదాలతో గొడవలు పడడం రోజూ చూస్తూనే ఉంటాం. కానీ ఒకే పార్టీలో ఉన్న వారు చొక్కాలు చిరిగేలా కొట్టుకోవడం లాంటివి చాలా అరుదు, ఒకవేళ వారి మధ్య విభేదాలు ఉన్నా లోపల్లోపలే వారికి గోతులు తవ్వుతారు తప్ప బయటకి కనపడనివ్వరు. అది రాజకీయాల్లో ఉండాల్సిన ముఖ్యమైన క్వాలిటీ అనేది వేరే టాపిక్ అనుకోండి..

ఇప్పుడు ఈ టాపిక్ ఎందుకు వచ్చిందంటే.. కడప జిల్లా బి కోడూరు నియోజక వర్గంలో శంకుస్థాపన రాయి విషయంలో రెండు వర్గాల మధ్య చొక్కాలు చించుకొని కొట్టుకునే స్థాయి గొడవ జరిగింది. అది కూడా అధికార పార్టీ అయిన వైసీపీ కార్యకర్తల ఇరు వర్గాల మధ్యే గొడవ జరగడం గమనార్హం. ఆంధ్రప్రదేశ్, బి కోడూరు నియోజకవర్గంలోని పాయలకుంట గ్రామంలో గ్రామ పంచాయితీ బిల్డింగ్ కోసం శంకుస్థాపన రాయిని స్థాపించడానికి ఎమ్మెల్యే వెంకట సుబ్బయ్య రాగా మరో వర్గం వారు దానిని ఆపడానికి ప్రయత్నించే క్రమంలో ఘర్షణ మొదలైంది. రామకృష్ణారెడ్డి – డి. యోగానందరెడ్డి గ్రూపులు ఒకరిని ఒకరు తోసుకొని కొట్టుకోవడమే కాకుండా ఒకరిమీద ఒకరు రాళ్లు రువ్వుకున్నారు. వెంటనే పోలీసులు ఆ గొడవని కంట్రోల్ చేయడానికి చూసారు. ఈ లోపే 8 మందికి బాగా గాయాలయ్యాయి. వారిని దగ్గర్లోని హాస్పిటల్ కి తీసుకెళ్లారు.