టీడీపీ మహానాడు.. కొత్త నాయకత్వమే దిక్కు.!

తెలుగుదేశం పార్టీకి పూర్వ వైభవం వస్తుందా.? ఈ ప్రశ్న ఇప్పుడు మహానాడు సందర్భంగా టీడీపీ కార్యకర్తల్ని వేధిస్తోంది. నిజానికి, 2014 ఎన్నికలకు ముందే తెలుగుదేశం పార్టీ తన ఉనికిని దాదాపుగా కోల్పోయింది. అయితే, ఉమ్మడి ఆంధ్రప్రదేశ్‌ రెండుగా విడిపోవడంతో.. అనూహ్యంగా ఆంధ్రప్రదేశ్‌లో తెలుగుదేశం పార్టీ పుంజుకుంది. దానిక్కారణం బీజేపీ – టీడీపీ కలిసి పోటీ చేయడం, జనసేన పార్టీ.. ఆ రెండు పార్టీలకీ మద్దతివ్వడం.

ఆంధ్రప్రదేశ్‌లో అధికారం దక్కించుకున్నా, తెలంగాణలో టీడీపీ తన ఉనికిని చాటుకోవడానికి నానా తంటాలూ పడింది అప్పట్లో. ఆ తర్వాత పూర్తిగా తెలంగాణలో టీడీపీ కనుమరుగైపోయే పరిస్థితి దాపురించిందనుకోండి.. అది వేరే విషయం. ఇక, ఇప్పుడు ఆంధ్రప్రదేశ్‌లో టీడీపీ పరిస్థితి అచ్చం అలానే తయారైంది.

2019 ఎన్నికల్లో టీడీపీ నుంచి గెలిచిన 23 మంది ఎమ్మెల్యేలలో ప్రస్తుతానికి టీడీపీకి మిగిలింది ముగ్గురే. మరో అరడజను మంది ఎమ్మెల్యేలు టీడీపీ నుంచి వైసీపీలో చేరేందుకు సిద్ధంగా వున్నారన్న ప్రచారం జరుగుతోంది. మరి, ఈ పరిస్థితుల్లో మహానాడు వేదికగా టీడీపీ అధినేత చంద్రబాబు, పార్టీ శ్రేణులకు ఎలా దిశానిర్దేశం చేయాలి.? వారిలో మళ్ళీ కొత్త ఉత్సాహం ఎలా నింపాలి.? ఈ అంశాలపై పార్టీ శ్రేణుల్లోనే నిస్తేజం నెలకొంది. ‘టీడీపీకి కొత్త నాయకత్వమే దిక్కు..’ అని పార్టీ శ్రేణులు ముక్త కంఠంతో నినదించాలనుకుంటున్నా.. ఆ మాట పైకి అనలేకపోతున్నారు.

ఇక్కడ కొత్త నాయకత్వం అంటే, నారా లోకేష్‌.. అన్న భావన కొంతమంది టీడీపీ నేతలకు కలుగుతుండడం ఆశ్చర్యం. కానీ, ఆ కొత్త నాయకత్వం అంటే యంగ్‌ టైగర్‌ ఎన్టీఆర్‌ మాత్రమేనన్నది మెజార్టీ టీడీపీ నేతల అభిప్రాయం. అన్నగారు స్థాపించిన పార్టీకి ఇప్పుడు ఈ దుస్థితి ఏంటి.? అని నిఖార్సయిన టీడీపీ కార్యకర్తలంతా ఆవేదన చెందుతున్నారన్నది నిర్వివాదాంశం. ఈ పరిస్థితికి కారణమెవరు.? అంటే నిస్సందేహంగా చంద్రబాబే కారకుడు. ఇందులో ఇంకో మాటకు తావు లేదు.

తెలంగాణ విషయంలో కావొచ్చు, పార్టీ ఫిరాయింపుల విషయంలో కావొచ్చు, మరో విషయంలో కావొచ్చు.. చంద్రబాబు రెండు నాల్కల ధోరణి టీడీపీని నిలువునా ముంచేసింది. బీజేపీతో కలిశారు, విడిపోయారు.. చివరికి కాంగ్రెస్‌తోనూ కలిసింది టీడీపీ. ఇకపై టీడీపీ కలవాలనుకున్నా, ఏ రాజకీయ పార్టీ కూడా ముందుకు రాని పరిస్థితి. కార్యకర్తల త్యాగాల్ని కీర్తించి, తమ సొంత భజన చేసుకుంటే.. సరిపోదు.

టీడీపీ నాయకత్వం ప్రస్తుతం ఆత్మ విమర్శ చేసుకోవాలి. పార్టీలో మెజార్టీ ఏమనుకుంటోందో తెలుసుకోవాలి. ప్రజల తరఫున నిలబడాలి. ఆత్మ విమర్శ సాధ్యం కానప్పుడు మహానాడు నిర్వహణ ఎందుకు దండగమారి వ్యవహారం కాకపోతే.!