కరోనా వైరస్‌ నేపథ్యంలో సినిమా షూటింగులు ఎప్పుడో ఆగిపోయాయ్‌.. సినిమా థియేటర్లూ మూతబడ్డాయ్‌. లాక్‌డౌన్‌ సడలింపులతో సినీ పరిశ్రమకూ కొంత ఊరట కలుగుతుందని అంతా భావించారు. పోస్ట్‌ ప్రొడక్షన్‌కి సంబంధించిన పనులు చేసుకోవచ్చని తెలంగాణ ప్రభుత్వం చెబుతోంది. కానీ, షూటింగులకు అనుమతి లభించేదెప్పుడు.? థియేటర్లు తెరుచుకునేదెప్పుడు.?
తెలంగాణ ప్రభుత్వం ఒక్కటీ అనుమతిస్తే సరిపోదు.. కేంద్రం సినీ పరిశ్రమ పట్ల కాస్తంత సానుకూలంగా వ్యవహరించాలి. దేశవ్యాప్తంగా థియేటర్లు తెరుచుకుంటేనే, వాట్‌ నెక్స్‌ట్‌ అన్నదానిపై సినీ పరిశ్రమకు ఓ అవగాహన వస్తుంది. కానీ, అది అప్పుడే జరిగేలా కన్పించడంలేదు. సోషల్‌ డిస్టెన్సింగ్‌ వంటి పదాలు నిన్న మొన్నటిదాకా బాగానే వున్నా, సడలింపుల తర్వాత అది ఎంతవరకు దేశంలో సాధ్యమవుతుంది.? సినీ పరిశ్రమలో ఇదెంతవరకు పాటించదగ్గది.? అన్న విషయమై చాలా అనుమానాలున్నాయి.
ఓవర్సీస్‌ బిజినెస్‌ కూడా సినిమాకి అత్యంత కీలకం. జనం థియేటర్ల దగ్గరకి గుంపులు గుంపులుగా వస్తేనే నిర్మాతలకు వర్కవుట్‌ అవుతుంది. అంతే తప్ప, సోషల్‌ డిస్టెన్సింగ్‌ పాటించాలంటూ 1000 సీటింగ్‌ సామర్థ్యమున్న ది¸యేటర్‌లో 500 టిక్కెట్లకు అనుమతిస్తే ఎలా.? షూటింగ్‌ సందర్భంలోనూ ఫిజికల్‌ కాంటాక్ట్‌ వుంటుంది. దాన్నెలా నివారించగలం.? రొమాంటిక్‌ సీన్స్‌ ఎలా తీస్తారు.? రెయిన్‌ సాంగ్స్‌ ఎలా ప్లాన్‌ చేస్తారు.? యాక్షన్ ఎపిసోడ్స్‌ మాటేమిటి.? చెప్పుకుంటూ పోతే సినిమా కష్టాలు అన్నీ ఇన్నీ కావు.
పోనీ, పరిస్థితి అదుపులోకి వచ్చినట్లే కాబట్టి సినిమాలు తీసేద్దామంటే.. రేప్పొద్దున్న మళ్ళీ పరిస్థితులు తేడాకొట్టవన్న గ్యారంటీ ఏంటి.? విడుదల డేట్‌ అనౌన్స్‌ చేసుకుని మరీ ఆగిపోయిన సినిమాల పరిస్థితి తలచుకుంటే, ఏ నిర్మాత అయినా ధైర్యంగా ముందడుగు వేసి కొత్త సినిమా తీయగలిగే పరిస్థితి కన్పిస్తుందా.? ఏదీ ఇదివరకటిలా వుండదన్నది నిర్వివాదాంశం. అది సినీ పరిశ్రమకూ వర్తిస్తుంది.
కానీ, సినిమా అంటే ఆ కిక్కు వేరు. థియేటర్లు కళకళ్ళాడాలి.. అలా జరగాలంటే ప్రేక్షకులు ధైర్యంగా సినిమాకి రావాలి. ఇది జరిగినప్పుడే నిర్మాత ధైర్యంగా సినిమా తీయగలడు. దానికి ఎంత సమయం పడుతుందో ఇప్పుడే చెప్పలేం. ఈలోగా జస్ట్‌ పోస్ట్‌ ప్రొడక్షన్‌ పనులు చేసుకోండి, ఆ తర్వాత షూటింగులు జరుపుకోండి.. అనంటే అది సినీ పరిశ్రమకు తీపి కబురు ఎలా అవుతుంది.?