బాలీవుడ్ సూపర్ స్టార్ సల్మాన్ ఖాన్ తో డేరింగ్ అండ్ డాషింగ్ దర్శకుడు పూరి జగన్నాథ్ సినిమా చేసే అవకాశాలు ఉన్నాయా అంటే అవుననే అంటున్నాయి టాలీవుడ్ వర్గాలు. జెట్ స్పీడ్ లో స్క్రిప్ట్ సిద్ధం చేసే అలవాటున్న పూరి జగన్నాథ్ ఈ లాక్ డౌన్ పీరియడ్ లో ఒక స్క్రిప్ట్ ను పూర్తి చేసినట్లు తెలుస్తోంది. పూరి జగన్నాథ్ దర్శకుడిగా బాలీవుడ్ సూపర్ స్టార్ తో కలిసి పనిచేసే అవకాశం ఉన్నట్లు టాక్.
గతేడాది ఇస్మార్ట్ శంకర్ తో హిట్ కొట్టి ఫామ్ లోకి వచ్చిన పూరి జగన్నాథ్, ఈ ఏడాది విజయ్ దేవరకొండ హీరోగా ఫైటర్ చిత్రాన్ని చేస్తున్న విషయం తెల్సిందే. ఈ సినిమా షూటింగ్ శరవేగంగా సాగుతుండగా లాక్ డౌన్ కారణంగా షూటింగ్ కు బ్రేక్ పడింది. ఇక ఈ బ్రేక్ టైమ్ లో కొత్త సినిమా స్క్రిప్ట్ రాస్తున్నానని పూరి జగన్నాథ్ స్వయంగా వెల్లడి చేసాడు.
ప్రస్తుత ఫైటర్ ప్యాన్ ఇండియా లెవెల్లో తీస్తున్న పూరి, ఇకపై తన సినిమాలను అలాగే భారీ లెవెల్లో తెరకెక్కించాలనుకుంటున్నాడట. ఇప్పుడు తయారుచేసిన స్క్రిప్ట్ కూడా బాలీవుడ్ సూపర్ స్టార్ సల్మాన్ ఖాన్ ను దృష్టిలో పెట్టుకుని రాసినది అని అంటున్నారు. ప్రస్తుతం సల్మాన్ ఖాన్ చేతిలో ఉన్న రెండు సినిమాలు పూర్తైన తర్వాత సల్మాన్ ఖాన్ తో పూరి పనిచేస్తాడని సమాచారం.
గతంలో పూరి జగన్నాథ్ అమితాబ్ బచ్చన్ తో బుడ్డా హోగా తేరా బాప్ ను తెరకెక్కించాడు. ఆ సినిమా మంచి విజయాన్ని నమోదు చేసుకుంది. ఇక ఇప్పుడు వరసగా బాలీవుడ్ లో సినిమాలను ప్లాన్ చేస్తున్నాడు పూరి.