రోడ్డెక్కిన బస్సులు.. భయం భయంగానే ప్రయాణం.!

తెలుగు రాష్ట్రాల్లో ఆర్టీసీ బస్సులు రోడ్డెక్కాయి.. ఈ విషయంలో ఆంధ్రప్రదేశ్‌ కంటే తెలంగాణ ముందుంది. తెలంగాణలో ఇప్పటికే బస్సులు రోడ్డెక్కగా, ఆంధ్రప్రదేశ్‌లో నేటి నుంచే బస్సులు అందుబాటులోకి వచ్చాయి. ప్రస్తుతానికైతే ఛార్జీల పెంపు లేదు ఇరు రాష్ట్రాల్లోనూ. బస్సుల్లో ‘ఫిజికల్‌ డిస్టెన్సింగ్‌’ పాటించేలా ఏర్పాట్లు జరిగాయి. ఆంధ్రప్రదేశ్‌ రోడ్డు రవాణా సంస్థ విషయానికొస్తే, డిపో నుంచి డిపో వరకు మాత్రమే బస్సులు నడుస్తున్నాయి. బస్సులో టిక్కెట్లు లభించే పరిస్థితి లేదు. తెలంగాణలో పరిస్థితి కాస్త భిన్నంగా వుంది.

ఇక, ప్రయాణీకుల విషయానికొస్తే, అత్యవసర ప్రయాణాల నిమిత్తం మాత్రమే ప్రజలు బస్సులెక్కుతుండడం గమనార్హం. అయితే, బస్సు ఎక్కాక ప్రయాణికులు భయం భయంగానే ప్రయాణించాల్సి వస్తోంది. బస్సులో ఎవరన్నా కరోనా వైరస్‌తో బాధపడుతున్నవారు వున్నారా.? అన్న ఆందోళన ప్రయాణీకుల్లో కన్పిస్తోంది. మాస్క్‌ లేకుండా బస్సుల్లో ప్రయాణానికి అవకాశం కల్పించడంలేదు. ఎన్ని జాగ్రత్తలు తీసుకుంటున్నాసరే, తమ భయాలు తమకు వుంటున్నాయనీ, తప్పక ప్రయాణాలు చేస్తున్నామనీ ప్రయాణీకులు చెబుతున్నారు.

ప్రధానంగా ఆసుపత్రులకు వెళ్ళేవారు, ఉపాధి నిమిత్తం ఒక చోటు నుంచి ఇంకో చోటకు వెళ్ళేవారు బస్సుల్లో కనిపిస్తున్నారు. మరోపక్క, జూన్‌ 1 నుంచి దేశవ్యాప్తంగా ప్రయాణీకుల రైళ్ళు పరుగులు పెట్టనున్నాయి. ఈ నెల 25 నుంచి డొమెస్టిక్‌ విమాన సర్వీసులు కూడా ప్రారంభం కానున్న విషయం విదితమే. మొత్తమ్మీద, ప్రజా రవాణా క్రమక్రమంగా అందుబాటులోకి వస్తోందన్న మాట దాదాపు రెండు నెలల విరామం తర్వాత.

ప్రస్తుతానికైతే కొంత ఆందోళన నడుమ ప్రయాణాలు సాగుతున్నా, ముందు ముందు ఎలాంటి బెరుకూ ప్రయాణీకుల్లో వుండదన్నది అధికారులు చెబుతున్న మాట. ఆ సంగతి పక్కన పెడితే, ఈ ప్రజా రవాణా కారణంగా కరోనా వైరస్‌ కేసులు రానున్న రోజుల్లో పెరుగుతాయా.? అన్న అనుమానాలు మరింత ఎక్కువగా విన్పిస్తున్నాయి.