వేడుకలకు ఇదా సమయం?

‘కరోనాకు ఆత్మగౌరవం ఎక్కువ. మనం పిలిస్తే తప్ప రాదు. అది రాకుండా తీసుకునే జాగ్రత్తలే మనకు రక్ష’ – ఇదీ కరోనా వైరస్ తెలంగాణలో మొదలైన తర్వాత సీఎం కేసీఆర్ చెప్పిన మాట. ఇది నూటికి నూరు పాళ్లూ నిజం. ఆ వైరస్ ను మనం కావాలని తగిలించుకుంటే తప్ప.. దానంతట అది రాదు. ఓ వైపు దేశంలో కరోనా విజృంభిస్తున్నా, కొందరు మాత్రం పుట్టినరోజు వేడుకలు, ఇతరత్రా ఫంక్షన్లు నిర్వహిస్తూ వైరస్ ను చేజేతులారా తెచ్చుకుంటున్నారు. పెళ్లికి పది మంది, చావుకు 20 మంది మించకుండా ఉండాలని ప్రభుత్వాలు ఎందుకు చెబుతున్నాయో అని ఎవరూ ఆలోచించడంలేదు.

తాజాగా హైదరాబాద్ లో ఒకే అపార్ట్ మెంట్ లో 28 మందికి కరోనా సోకడానిక కారణం.. అక్కడ ఓ చిన్నారి పుట్టినరోజు వేడుకలు నిర్వహించడమేనని తేలింది. ఏప్రిల్ చివరి వారంలో ఆ చిన్నారి బర్త్ డే ఫంక్షన్ నిర్వహించగా.. వారం క్రితం తొలుత ఆ చిన్నారి తండ్రికి, తర్వాత చిన్నారికి కూడా వైరస్ సోకినట్టు వెల్లడైంది. అలా ఇప్పటివరకు 28 మందికి కరోనా వచ్చింది. అలాగే హైదరాబాద్ లోనే ఓ కిరాణా వ్యాపారి నుంచి ఆయన కుటుంబ సభ్యులు, బంధువుల్లో 20 మందికి వైరస్ సోకింది. ఆయన కూడా ఓ బర్త్ డే ఫంక్షన్ నిర్వహించడమే వైరస్ వ్యాప్తికి కారణమైంది. ఆ కుటుంబంలో ఇప్పటికే ఇద్దరు ప్రాణాలు కూడా కోల్పోయారు.

ఇక తూర్పుగోదావరి జిల్లాలో కోయంబేడు వెళ్లి వచ్చిన ఓ లారీ డ్రైవర్ కారణంగా దాదాపు 150 మంది రిస్కులో పడ్డారు. ఆయన కూడా ఓ ఫంక్షన్ నిర్వహించడంతో దానికి వెళ్లినవారంతా ఇప్పుడు క్వారంటైన్ లో ఉన్నారు. కరోనా కల్లోలం సృష్టిస్తున్న సమయంలో వేడుకలు నిర్వహించుకోవడానికి, సమూహాలుగా ఉండటానికి ఎంత దూరంగా ఉంటే అంత మంచిదని వైద్య నిపుణులు సూచిస్తున్నారు.