కేంద్రంతో అమీ తుమీ.. తగ్గేదే లేదంటున్న కేసీఆర్‌

ప్రధాన మంత్రిని ఎలా గౌరవించాలో.. అదే ప్రధాన మంత్రిని ఎలా ప్రశ్నించాలో బాగా తెలుసు తెలంగాణ ముఖ్యమంత్రి కల్వకుంట్ల చంద్రశేఖర్‌రావుకి. సుదీర్ఘ రాజకీయ అనుభవం ఆయన సొంతం. తెలంగాణ ఉద్యమాన్ని నడపడమే కాదు, విజయ తీరాలకు చేర్చిన ఘనుడాయన. ఉద్యమంలో కేంద్రాన్ని నిలదీశారు.. అదే సమయంలో కేంద్రాన్ని దార్లోకి తెచ్చుకున్నారు. ఆ నేర్పరితనం ఆయన సొంతం. ఇప్పుడూ కేసీఆర్‌, అదే తరహా రాజకీయ వ్యూహాన్ని అమలు చేస్తున్నారు.

అయితే, అప్పుడు ప్రధానిగా మన్మోహన్‌సింగ్‌ వున్నారు. ఇప్పుడు నరేంద్ర మోడీ ప్రధాని. అప్పటికీ ఇప్పటికీ చాలా తేడా. కేసీఆర్‌ పప్పులు కేంద్రం వద్ద ఉడికే పరిస్థితి వుందా.? అన్నది మిలియన్‌ డాలర్ల ప్రశ్న. కరోనా వైరస్‌ నేపథ్యంలో కేంద్రానికి ఇవ్వాల్సిన గౌరవం ఇస్తున్నారు కేసీఆర్‌. అదే సమయంలో, కేంద్రాన్ని నిలదీస్తున్నారు కూడా.

రాష్ట్రాలకు ఆర్థిక స్వేచ్చ కల్పించకపోతే రానున్న రోజుల్లో దేశం ఇబ్బందుల్లో పడుతుందని కేసీఆర్‌ పదే పదే చెబుతున్నారు. ‘ఈ విషయాన్ని మీరు ప్రత్యేకంగా ప్రస్తావించాలి.. ఇది కేంద్రం దృష్టికి వెళ్ళాలి..’ అంటూ నేషనల్‌ మీడియాని ఉద్దేశించి చెబుతున్న కేసీఆర్‌, కేంద్రానికి తాను చెప్పదలచుకున్నది అరటిపండు తొక్క ఒలిచి పెట్టినట్లుగానే చెప్పేస్తున్నారు.

‘హెలికాప్టర్‌ మనీ కాకపోతే.. ఎయిర్‌ క్రాఫ్ట్‌ మనీ అని పేరు పెట్టండి.. కానీ, ప్రజల్ని ఆదుకోండి..’ అన్నది కేసీఆర్‌ సూచన. అయితే, కేంద్రం ఈ విషయంలో సానుకూలంగా స్పందించడంలేదు. కరోనా వైరస్‌ నేపథ్యంలో దేశంలో ఆర్థిక పరిస్థితి అత్యంత అధ్వాన్నంగా తయారైంది. రాష్ట్రాలు కుదేలవుతున్నాయి. రాష్ట్రాలు ఆర్థికంగా కుదురుకోవాలంటే, అది కేంద్రం కల్పించే వెసులుబాట్లతోనే సాధ్యమవుతుందన్నది కేసీఆర్‌ వాదన.

‘మీరు ఇవ్వరు, మేం అప్పు తెచ్చుకునే పరిస్థితీ కల్పించరు. ఇలాగైతే ఎలా.?’ అన్ని నిన్న కేసీఆర్‌ ఒకింత ఘాటుగా ప్రశ్నించారు. ‘కేంద్రం తప్పులు చేస్తోంది.. అది దేశానికి ప్రమాదకరంగా మారబోతోంది..’ అంటూ కేసీఆర్‌ తన మనసులో భావాల్ని స్పష్టం చేసేశారు. మొత్తంగా చూస్తే, మోడీని కరోనా విషయంలో సమర్థిస్తూనే, రాష్ట్ర ప్రయోజనాల విషయంలో, దేశ ప్రయోజనాల విషయంలో కేంద్రంతో అమీ తుమీకి కేసీఆర్‌ సిద్ధమవుతున్నారన్నమాట.